MILLI BANKIN MƏTBUAT XIDMƏTININ MƏLUMATI
Azərbaycan Prezidenti Heydər Əliyevin “Azərbaycan Respublikasında sahibkarlığın inkişafına dövlət himayəsi sahəsində əlavə tədbirlər haqqında” 10 sentyabr 2002-ci il tarixli Fərmanına uyğun olaraq, Milli Bankın İdarə heyəti 2002-ci il sentyabrın 16-dan etibarən mərkəzləşdirilmiş kredit resurslarına görə uçot dərəcəsinin 10 faizdən 7 faizə endirilməsi barədə qərar qəbul etmişdir. Müqayisə üçün bildirək ki, MDB ölkələri arasında bu, ən aşağı göstəricidir. Məsələn, 2002-ci il avqustun 1-nə olan məlumata görə, Qazaxıstanda uçot dərəcəsi 8 faiz, Rusiyada isə 21 faizdir.
Son illər ölkə iqtisadiyyatında baş verən müsbət dəyişikliklər bu qərarın qəbul edilməsi üçün əlverişli zəmin yaratmışdır. Ölkədə makroiqtisadi sabitliyin dayanıqlı xarakter alması, struktur islahatları nəticəsində real sektorun pul ehtiyatlarına sərmayə təyinatlı tələbatının artması, ardıcıl bank islahatlarının aparılması iqtisadiyyata pul təklifini daha da artırmaq üçün geniş imkanlar yaratmışdır. Belə bir şəraitdə Milli Bankın həyata keçirdiyi məqsədyönlü tədbirlər ölkənin pul bazarında pul təklifi kanallarını genişləndirmiş, iqtisadiyyata, xüsusən də kiçik və orta sahibkarlara verilən kreditlərin həcminin artırılmasını şərtləndirməklə, faiz dərəcələrinin enməsi meylini gücləndirmişdir.
Bölmənin digər xəbərləri
