MİLLİ MƏCLİSDƏ GÖRÜŞ
Milli Məclisin aqrar, iqtisadi və sosial siyasət daimi komissiyaları üzvlərinin Bakıda akkreditə olunmuş diplomatik missiyaların nümayəndələri ilə görüşü keçirilmişdir. Söhbətin əsas mövzusu deputatlarımızın xarici ölkə səfirliklərinin iqtisadi məsələlər üzrə müşavirləri ilə əməkdaşlığı məsələləri, habelə Azərbaycanda xarici kapital üçün əlverişli sərmayə mühiti yaradılmasının perspektivləri olmuşdur.
Xarici işlər nazirinin müavini Mahmud Məmmədquliyev və Milli Məclisin iqtisadi siyasət daimi komisiyasının sədri Səttar Səfərov görüşdə çıxış edərək vurğuladılar ki, Azərbaycanda son 7 ildə aparılan islahatlar nəticəsində iqtisadiyyatın müxtəlif sahələrində böyük nailiyyətlər əldə olunmuşdur. Ötən il ümumi daxili məhsulun 10 faiz artması buna sübutdur. Bundan əlavə, ölkə iqtisadiyyatı qloballaşma prosesləri kontekstində dünya iqtisadiyyatı sisteminə sürətlə inteqrasiya edir. Bu günə qədər vergilər nazirliyində xarici sərmayə ilə işləyən 2400-dən çox müəssisənin qeydə alınması Azərbaycan Prezidenti Heydər Əliyevin rəhbərliyi ilə həyata keçirilən uğurlu iqtisadi siyasətin daha bir təsdiqidir.
Sonra səfirliklərin nümayəndələrinə yerli istehsala təkan verən qanunvericilik bazası yaradılması barədə ətraflı məlumat verildi. Bildirildi ki, müvafiq qanunvericilik aktları hazırlanarkən ölkənin bölgələrində, o cümlədən dağlıq və sərhəd rayonlarında istehsalın inkişafına başlıca diqqət yetirilir.
Yunanıstanın Azərbaycandakı səfiri Merkurios Karafotias həmkarları adından görüşün təşkilatçılarına təşəkkürünü bildirərək dedi ki, Azərbaycanda, həqiqətən, iqtisadi tərəqqi baş verir. O, xüsusi vurğuladı ki, ölkələrin iqtisadi əməkdaşlığının əsas şərti iş adamları arasında qarşılıqlı surətdə faydalı əlaqələrin və siyasətçilər arasında mehriban münasibətlərin yaradılmasıdır.
Rusiya səfirliyinin iqtisadi məsələlər üzrə müşaviri Oleq Padayev və Türkiyə səfirliyinin ticarət üzrə müşaviri Bəhri Özdəmir ölkələrinin Azərbaycanla iqtisadi əməkdaşlığının inkişafı məsələlərindən ətraflı danışdılar. Onlar hər bir ölkənin tərəqqisinin başlıca şərti olan kiçik və orta sahibkarlığın inkişafı üçün səylərin əlaqələndirilməsinin vacibliyini vurğuladılar.
Bölmənin digər xəbərləri
