MİLLİ MƏCLİSİN DEPUTATI STRASBURQDA AZƏRBAYCANLI TƏLƏBƏLƏRLƏ GÖRÜŞMÜŞDÜR
Fransadakı Azərbaycan Tələbələri Assosiasiyasının sədri Valeh Əsgərov təhsilləri və təşkilatları barədə Milli Məclisin deputatına ətraflı məlumat vermişdir.
Gülər Əhmədova Azərbaycan–Fransa parlamentlərarası dostluq qrupunun sədri olduğunu xatırlatmış, Prezident İlham Əliyevin xaricdə təhsil alan tələbələrə daim diqqət və qayğı göstərdiyini xüsusi vurğulamışdır.
Deputat Prezident İlham Əliyevin Milli Məclisin payız sessiyasının açılışında söylədiyi nitqlə bağlı tələbələrə ətraflı məlumat vermiş, azərbaycanlı gənclərin, xüsusilə xarici ölkələrdə təhsil alan tələbələrimizin respublikamızın mənafeyi naminə, ölkəmiz barədə həqiqətləri dünya ictimaiyyətinə çatdırmalarının vacibliyini qeyd etmişdir.
Gülər Əhmədova Strasburqun müxtəlif ali təhsil ocaqlarında təhsil alan tələbələri daha fəal olmağa çağırmış və bu sahədə onlara kömək etməyə hazır olduğunu bildirmişdir.
Milli Məclisin deputatı müxtəlif dövlət qurumlarının xaricdə təhsil alan tələbələrə xüsusi maraq göstərdiklərini, vətənə qayıtdıqdan sonra onların işlə təmin olunmaları üçün ayrıca siyahı tərtib edildiyini bildirmiş, tələbələri Azərbaycan həqiqətlərinin təhsil aldıqları ölkədə və ali məktəblərdə yayılması üçün daha fəal olmağa səsləmiş, bunun üçün müxtəlif səviyyələrdə görüşlər, gecələr və konfranslar təşkil etməyi tövsiyə etmişdir.
G.Əhmədova tələbələrimizi maraqlandıran müxtəlif suallara cavab vermişdir.
Sonda tələbələr dövlətimizin qayğısını daima hiss etdiklərini xüsusi vurğulamış və maraqlı görüşə görə təşəkkürlərini bildirmişlər.
