Milli Məclisin deputatları AŞPA-nın payız sessiyasında iştirak edəcəklər
Bakı, 8 oktyabr, AZƏRTAC
Milli Məclisin Avropa Şurası Parlament Assambleyasında nümayəndə heyətinin rəhbəri, parlamentin komitə sədri Səməd Seyidov, nümayəndə heyətinin üzvləri - deputatlar Erkin Qədirli, Rafael Hüseynov, Nigar Arpadarai, Kamal Cəfərov, Pərvin Kərimzadə, Fazil Mustafa, Asim Mollazadə və Sevinc Fətəliyeva qurumun payız sessiyasında iştirak etmək üçün oktyabrın 9-da Fransanın Strasburq şəhərinə səfər edəcəklər.
Milli Məclisin Mətbuat və ictimaiyyətlə əlaqələr şöbəsindən AZƏRTAC-a bildirilib ki, sessiyada AŞPA-nın Büro və Daimi komitələrinin işi haqqında hesabat dinləniləcək, Qərbi Balkan ölkələri üçün Avropa perspektivinin dəstəklənməsi, Avropa Şurasına üzv dövlətlərin Şengen informasiya sistemindən siyasi motivli sanksiya kimi sui-istifadə etməsi, Türkiyə, Macarıstan, Rumıniya tərəfindən öhdəliklərin yerinə yetirilməsi, miqrasiyanın tənzimlənməsi, idman dünyasında qadınlara qarşı ayrı-seçkiliyə son qoyulması, əmək hüquqlarına yenidən baxılması, peyvənd ayrı-seçkiliyinin qarşısının alınması və digər məsələlərə baxılacaq.
Parlament nümayəndə heyətinin üzvləri sessiyada müzakirəyə çıxarılacaq məsələlərlə bağlı fikirlərini açıqlayacaq, qeyd və təkliflərini bildirəcəklər.
Səfər oktyabrın 16-da başa çatacaq.
Bölmənin digər xəbərləri
