SİYASƏT
Milli Məclisin payız sessiyasının ilk iclası keçirilib
AZƏRTAC xəbər verir ki, Milli Məclisin sədri Oqtay Əsədov iclası açdıqdan sonra Azərbaycanın dövlət himni səsləndi.
Sonra Oqtay Əsədov 2014-cü ilin yaz və növbədənkənar sessiyalarında Milli Məclisin fəaliyyəti haqqında məlumat verdi. Bildirildi ki, bu dövrdə Milli Məclisin 12 iclası keçirilib, parlamentdə 131 qanun və qərar qəbul olunub. Azərbaycan Prezidenti İlham Əliyevin rəhbərliyi ilə həyata keçirilən dövlət siyasətinin hüquqi bazası daha da möhkəmlənib.
Qeyd edildi ki, ötən dövrdə parlamentin beynəlxalq əlaqələri də sürətlə inkişaf edib. Milli Məclisin nümayəndə heyətləri beynəlxalq təşkilatların işində fəal iştirak ediblər. Ümumilikdə 38 ölkəyə 75 nümayəndə heyəti səfər edib. Deputatlarımız Türkiyədə prezident, Serbiyada parlament seçkilərində müşahidəçi qismində iştirak ediblər. Qırxdan çox ölkənin nümayəndələri Azərbaycana səfər çərçivəsində Milli Məclisdə olublar. Azərbaycan parlamentinin xətti ilə Bakıda 6 beynəlxalq təşkilatın tədbirləri keçirilib.
Daha sonra gündəlik təsdiq olundu.
Cari məsələlərin müzakirəsi zamanı Avropa Parlamentinin sentyabrın 18-də Azərbaycanla bağlı qəbul etdiyi qeyri-obyektiv qətnamə əsas diqqət mərkəzində olub.
Milli Məclisin sədri Oqtay Əsədov məsələyə münasibət bildirərək təəssüflə qeyd edib ki, Azərbaycanın uğurlarını gözü götürməyən qüvvələrin ölkəmizə qarşı təzyiq yolunu tutaraq bəzi beynəlxalq təşkilatların əli ilə ədalətsiz qətnamələr qəbul etdirməsi son vaxtlar adət halını alıb. Avropa Parlamentinin Azərbaycanla bağlı qətnaməsi də belələrindən biridir və bu sənəd ölkəmizdə çox vacib hadisələrin baş verdiyi bir dövrdə qəbul edilib. Oqtay Əsədov vurğulayıb ki, Azərbaycan belə təzyiqlər qarşısında heç vaxt geri çəkilməyəcək. Heç kim müstəqil Azərbaycanı öz yolundan döndərə bilməyəcək.
Milli Məclisin sədr müavini Bahar Muradova bildirib ki, bəzi beynəlxalq təşkilatlar Azərbaycanın müstəqil siyasətini özündən razılıq kimi qəbul edirlər. Onlar Azərbaycanı öz istəklərini həyata keçirmək məqsədilə alət kimi istifadə edə bilmədikləri üçün ölkəmizi müxtəlif bəhanələrlə ittiham edirlər. Milli Məclisin sədr müavini qeyd edib ki, Azərbaycan öz yolu ilə irəliləyir və heç kimin bu yola şübhəsi olmamalıdır. Heç bir qüvvə ölkəmizi öz yolundan döndərə bilməyəcək. Beynəlxalq dairələrin və zərərli fəaliyyətlə məşğul olan bir sıra təşkilatların əlində alətə çevrilməyi nə dövlət, nə də xalq qəbul etməz.
Azərbaycanda müxtəlif yönümlü qeyri-hökumət təşkilatlarının fəaliyyət göstərdiyini deyən B.Muradova QHT-lərin öz fəaliyyətlərinə sərf etdikləri maliyyə vəsaiti barədə hesabat vermələrinin zəruri olduğunu deyib. O əlavə edib ki, bu sahədə şəffaflıq olmalıdır və hər kəsin maliyyə qaynaqları açıq şəkildə göstərilməlidir.
Milli Məclis sədrinin müavini Valeh Ələsgərov çıxışında Avropa Parlamentinin Azərbaycana qarşı ikili standartlar nümayiş etdirdiyini deyib.
Çıxış edən deputatlar bildiriblər ki, Avropa Parlamentinin qəbul etdiyi bu qətnamə tamamilə əsassız və qərəzlidir. Azərbaycanın Avropa İttifaqına üzv ölkələrlə sıx əməkdaşlığı var. Təəssüf ki, Avropa Parlamenti ölkəmizlə bağlı qeyri-obyektiv qərar qəbul edir.
Sonra iclasda parlamentin 2014-cü il payız sessiyasının qanunvericilik işləri planı təsdiq edildi.
Deputatlar Türkdilli Dövlətlərin Əməkdaşlıq Şurasının IV Zirvə toplantısının Bəyannaməsinin, Azərbaycan Respublikasının Prezidenti və Fransa Respublikası Prezidentinin Birgə Bəyannaməsinin, həmçinin “Azərbaycan Respublikası ilə İtaliya Respublikası arasında strateji tərəfdaşlıq haqqında” Birgə Bəyannamənin, “Azərbaycan Respublikası Hökuməti ilə İtaliya Respublikası Hökuməti arasında dəniz nəqliyyatı haqqında”, “Azərbaycan Respublikası Hökuməti və Mərakeş Krallığı Hökuməti arasında gömrük işi sahəsində əməkdaşlıq və qarşılıqlı yardım haqqında”, “Azərbaycan Respublikası Hökuməti ilə Uruqvay Şərq Respublikası Hökuməti arasında gömrük işi sahəsində əməkdaşlıq və qarşılıqlı yardım haqqında”, “Azərbaycan Respublikası Hökuməti və Vyetnam Sosialist Respublikası Hökuməti arasında gəlirlərə və əmlaka görə vergilərə münasibətdə ikiqat vergitutmanın aradan qaldırılması və vergidən yayınmanın qarşısının alınması haqqında” sazişlərin, “Azərbaycan Respublikası ilə Avropa İttifaqı arasında Azərbaycan Respublikasının İttifaqın proqramlarında iştirakının ümumi prinsipləri haqqında Çərçivə Sazişi üzrə bir tərəfdən Azərbaycan Respublikası, digər tərəfdən Avropa İttifaqı və onun üzvü olan dövlətlər arasında Tərəfdaşlıq və Əməkdaşlıq Sazişinin Protokolu”nun, “Azərbaycan Respublikası Hökuməti və Səudiyyə Ərəbistanı Krallığı Hökuməti arasında gəlirlərə və əmlaka görə vergilərə münasibətdə ikiqat vergitutmanın aradan qaldırılması və vergidən yayınmanın qarşısının alınması haqqında” Konvensiyanın və onun Protokolunun təsdiq edilməsi barədə qanun layihələrinə baxıblar. Həmçinin “Beynəlxalq hava daşımalarının bəzi qaydalarının unifikasiyası üçün Konvensiya”nın təsdiq edilməsi haqqında qanun layihəsi müzakirə edilərək təsdiqlənib.
İclasda İnzibati Xətalar, Gömrük, Vergi, Əmək, Şəhərsalma və Tikinti məcəllələrində, “Poçt” haqqında, “Qiymətli kağızlar bazarında investorların hüquqlarının müdafiəsi” haqqında, “Fitosanitar nəzarəti haqqında”, “Baytarlıq haqqında”, “Ətraf mühitin mühafizəsi haqqında”, “Sanitariya-epidemioloji salamatlıq haqqında”, “Hidrotexniki qurğuların təhlükəsizliyi haqqında”, “Sahibkarlıq fəaliyyəti haqqında”, “İstehlakçıların hüquqlarının müdafiəsi haqqında”, “Cinayət yolu ilə əldə edilmiş pul vəsaitlərinin və digər əmlakın leqallaşdırılmasına və terrorçuluğun maliyyələşdirilməsinə qarşı mübarizə haqqında”, “Bank olmayan kredit təşkilatları haqqında”, “İnvestisiya fondları haqqında”, “Ölçmələrin vəhdətinin təmin edilməsi haqqında”, “Qiymətli metallar və qiymətli daşlar haqqında”, “Standartlaşdırma haqqında”, “Texniki təhlükəsizlik haqqında”, “Valyuta tənzimi haqqında”, “Yanğın təhlükəsizliyi haqqında”, “Siyasi partiyalar haqqında” və “Bələdiyyə torpaqlarının idarə edilməsi haqqında” qanunlara dəyişikliklər edilməsi barədə qanun layihələri qəbul edilib.
“Siyasi partiyalar haqqında” Qanuna təklif olunan dəyişikliyə əsasən şəxsin bir və ya bir neçə partiyaya il ərzində verdiyi ianələrin yuxarı həddi on min manatdan artıq ola bilməz. Siyasi partiyalar illik maliyyə hesabatlarını auditor rəyi ilə birlikdə hər il aprelin 1-dən gec olmayaraq Mərkəzi Seçki Komissiyasına təqdim edəcəklər. Həmin hesabatlar komissiyanın internet səhifəsində yerləşdiriləcək.
Sonda Avropa Parlamentinin 2014-cü il 18 sentyabr tarixli qətnaməsi ilə əlaqədar Azərbaycan Respublikası Milli Məclisinin Bəyanatı qəbul olundu.
