Bakı, 2 fevral, Aidə Quluzadə, AZƏRTAC 

Fevralın 2-də Milli Məclisin yaz sessiyası öz işinə başlayıb.

AZƏRTAC xəbər verir ki, parlamentin sədri Oqtay Əsədov iclası açdıqdan sonra Azərbaycanın dövlət himni səsləndirilib.

Oqtay Əsədov deyib ki, Milli Məclis ötən sessiya müddətində də Azərbaycan Prezidentinin rəhbərliyi ilə dövlət siyasətinin həyata keçirilməsində öz üzərinə düşən vəzifələrin öhdəsindən layiqincə gəlib. Eyni zamanda, Milli Məclisin yaz sessiyası üçün qanunvericilik işləri planı hazırlanıb.

Oqtay Əsədov deyib ki, bu sessiyada Konstitusiyaya uyğun olaraq hökumətin hesabatı dinləniləcək, büdcənin icrası ilə bağlı qanun layihəsinə baxılacaq, ombudsmanın hesabatı təqdim ediləcək və digər məsələlər müzakirə olunacaq.

Sonra iclasın gündəliyi təsdiq olunub və müzakirələr başlayıb.

Bu gün Azərbaycanda Gənclər Gününün qeyd edildiyini deyən deputatlar ölkəmizdə gənclərin inkişafı üçün həyata keçirilən işlərin yüksək qiymətləndirildiyini bildiriblər.

Deputatlar Azərbaycana qarşı ikili standartlar, beynəlxalq təşkilatların Ermənistan-Azərbaycan, Dağlıq Qarabağ münaqişəsində ədalətsiz mövqeyinə də münasibət bildiriblər. Qeyd olunub ki, dünyada baş verən maliyyə böhranına baxmayaraq, Azərbaycan gündən-günə inkişaf edir, ölkəmizin iqtisadi qüdrəti artır, əhalinin sosial rifahı yaxşılaşır. Azərbaycan neftdən gələn gəlirləri ən uğurla istifadə edən ölkədir. Bunu Dünya Bankı, Beynəlxalq Valyuta Fondu və digər beynəlxalq qurumlar da təsdiqləyir. Lakin Azərbaycanın bu inkişafı bir çox xarici qüvvələri, o cümlədən onların ölkə daxilindəki vassallarını narahat edir və ölkəmizə böhtan atmaq məqsədilə bir sıra yollara əl atılır. Xüsusilə Bakıda keçiriləcək I Avropa Oyunları ərəfəsində belə hallar daha da çoxalır.

Beynəlxalq təşkilatların Azərbaycana qarşı ikili standartlarına münasibət bildirən Oqtay Əsədov ölkə rəhbərliyinin buna cavab olaraq yürütdüyü xarici siyasətdən danışıb. Milli Məclisin sədri bildirib ki, bu yaxınlarda Azərbaycan nümayəndə heyətinin Avropa Şurası Parlament Assambleyasında Rusiyaya sanksiyaların tətbiq edilməsi təklifinə qarşı çıxması mətbuatda birmənalı qarşılanmayıb. Azərbaycan nümayəndə heyəti də öz fikrini bu şəkildə bildirdi ki, əgər Rusiya sanksiyalar tətbiq edilməyə layiq görülürsə, o zaman niyə Ermənistana qarşı bu cür sanksiyalar tətbiq olunmur? Bu, o demək deyil ki, biz Ukrayna ilə bağlı mənfi mövqedəyik. Azərbaycan Birləşmiş Millətlər Təşkilatında Ukraynanın ərazi bütövlüyünü tam dəstəklədi, lakin ölkəmiz öz səsini eşitdirmək üçün sanksiyalara qarşı çıxdı.

Müzakirələr zamanı deputatlar Xocalı soyqırımının 23-cü ildönümü ərəfəsində Azərbaycan həqiqətlərinin dünyaya çatdırılması istiqamətində görülən işlərin daha da genişləndirilməsinin önəmini vurğulayıblar.

Bildirilib ki, bu yaxınlarda bir qrup QHT-nin və müharibədən zərər çəkən insanların təşəbbüsü ilə Ermənistan prezidenti Serj Sarkisyanın hərbi cinayətkar kimi tanınması üçün beynəlxalq məhkəməyə verilməsi və məsuliyyətə cəlb edilməsi barədə petisiya hazırlanaraq BMT-nin Təhlükəsizlik Şurasına ünvanlanıb. Hazırda həmin petisiya ilə bağlı 100 min imzanın toplanması prosesinə başlanılıb.

Milli Məclis sədrinin müavini Bahar Muradova belə demokratik metodların gələcəkdə mütləq hansısa bir nəticəyə gətirib çıxaracağına inandığını deyib. O, Ermənistanın təcavüzkar siyasətinin pislənməsinin vacibliyini qeyd edib, bu ölkənin işğalçılıq siyasətinin ATƏT Parlament Assambleyasının qış sessiyasında yenidən qaldırılacağını diqqətə çatdırıb.

Daha sonra iclasda Milli Məclisin intizam, hesablayıcı komissiyalarının yenidən təşkil edilməsi haqqında qərar qəbul edilib. Eyni zamanda, 2015-ci il yaz sessiyasının qanunvericilik işləri planı haqqında qərara baxılıb və təsdiqlənib. Qanunvericilik planına Azərbaycan Respublikası Prezidentinin, Azərbaycan Respublikası Ali Məhkəməsinin, Azərbaycan Respublikası baş prokurorunun, Naxçıvan Muxtar Respublikası Ali Məclisinin qanunvericilik təşəbbüsü qaydasında təqdim etdiyi qanun layihələri, Silahlı Qüvvələr və başqa silahlı birləşmələr haqqında, hərbi qulluqçuların statusu barədə, kənd təsərrüfatı kooperasiyası haqqında, kənd təsərrüfatında informasiya-məsləhətvermə xidməti barədə, elm haqqında, Azərbaycan Respublikasının inzibati ərazi bölgüsündə qismən dəyişikliklər edilməsi barədə, Azərbaycan Respublikası qanunlarına dəyişikliklər və əlavələr edilməsi haqqında qanun layihələri daxildir. Plana əsasən parlamentdə bəzi hüquqi sənədlərə əlavə və dəyişikliklər edilməsinə dair layihələrə də baxılacaq.

İclasda qeyd olunub ki, bu ilin ölkəmizdə “Kənd təsərrüfatı ili” elan olunması aqrar sahənin inkişafına öz təsirini göstərəcək. Bu sahədə qanunvericilik planına salınan iki qanun layihəsi görülən işlərə təkan verəcək.

Daha sonra iclasda Azərbaycan ilə Macarıstan arasında strateji tərəfdaşlıq haqqında Birgə Bəyannamənin, “Azərbaycan Respublikası Hökuməti ilə Macarıstan Hökuməti arasında hava əlaqəsi haqqında” Sazişin təsdiq edilməsi barədə qanun layihələri qəbul olunub.

Sonra İnzibati Xətalar Məcəlləsində, “Yanğın təhlükəsizliyi haqqında”, “Fövqəladə hallar orqanlarında xidmətkeçmə haqqında”, “Əhalinin sağlamlığının qorunması haqqında”, “Yol hərəkəti haqqında” qanunlarda dəyişikliklər edilməsi barədə qanun layihələri təsdiqlənib.

İclasda, həmçinin “Reklam haqqında” qanun layihəsi birinci oxunuşda konseptual olaraq müzakirəyə çıxarılıb. Layihə səsə qoyularaq birinci oxunuşda qəbul edilib.