REGİONLAR
Milli Qurtuluş Günü əldə etdiyimiz bütün uğurların təməl daşı oldu
![](/files/galleryphoto/2023/2/1200x630/16867503492996714048_1200x630.jpeg)
![](/files/galleryphoto/2023/2/1200x630/16867503493512718328_1200x630.jpeg)
![](/files/galleryphoto/2023/2/1200x630/16867503493192021704_1200x630.jpeg)
Gəncə, 14 iyun, Elcan Məmmədov, AZƏRTAC
Azərbaycan Dövlət Aqrar Universitetinin (ADAU) Aqrobiznes və idarəetmə fakültəsində İctimai fənlər kafedrasının və YAP Gəncə şəhər təşkilatının 3 saylı ƏPT-nin birgə təşkilatçılığı ilə 15 İyun - Milli Qurtuluş Gününə həsr olunmuş “15 İyun - Milli Qurtuluş Günü müstəqilliyimizə gedən yolun başlanığıcıdır” adlı tədbir keçirilib.
AZƏRTAC-ın bölgə müxbiri xəbər verir ki, tədbirdə əvvəlcə Dövlət Himni səsləndirilib, Ümummilli Lider Heydər Əliyevin və ölkəmizin ərazi bütövlüyü uğrunda həlak olan şəhidlərin xatirəsi yad edilib.
Sonra YAP Gəncə şəhər təşkilatı 3 saylı ƏPT-nin sədri Azad Bayramov çıxış edərək bildirib ki, xalqların və dövlətlərin taleyində tarixi günlərin, yeni reallıqlar yaradan və inkişafa təkan verən ictimai-siyasi proseslərin olduqca böyük əhəmiyyəti var. 1993-cü ilin 9 iyununda xalqın təkidli tələbi ilə Bakıya dönən Heydər Əliyev mahiyyətcə, məzmunca yeni və daha parlaq bir tarixin yaradıcısı oldu. Bu dönüş, bu qayıdış bütün mənalarda milli qurtuluşumuz, nicatımız idi. Bu mənada Ulu Öndər Heydər Əliyevin Azərbaycan Respublikasının Ali Sovetinin sədri seçildiyi 1993-cü il iyunun 15-nin tariximizə Milli Qurtuluş Günü kimi daxil olması xalqımızın müdrik rəhbərinə verdiyi tarixi qiymət, öz sabahını müəyyənləşdirmək baxımından böyük tarixi qərardır. Prezident İlham Əliyevin “Azərbaycan tarixinin dönüş nöqtəsi” adlandırdığı Milli Qurtuluş Günü bu gün əldə etdiyimiz bütün uğurların təməl daşı oldu.
İctimai fənlər kafedrasının müəllimləri Səbinə Əlizadə, Şəfa Musayeva və YAP Gəncə şəhər təşkilatının məsul işçisi Orxan Əhmədov məruzələrində qeyd ediblər ki, Ulu Öndərin rəhbərliyi ilə qısa zaman ərzində aparılan siyasi-iqtisadi islahatlar, peşəkar ordu quruculuğu, bütün bunların fonunda yaranmış əmin-amanlıq, sabitlik, rifah xalqımızın sabaha olan ümidlərini artırdı, müdrik və cəsarətli rəhbərinin ətrafında yumruq kimi birləşdirdi. Prezident İlham Əliyev Ulu Öndərimizin xilaskarlıq, qurtuluş, tərəqqi və rifah missiyasını uğurla davam etdirdi. Ölkəmiz daha da qüdrətləndi, əsası Ulu Öndər tərəfindən qoyulan siyasi idarəçilik sistemi inkişaf etdirildi. Balanslaşdırılmış siyasət yürüdən ölkə rəhbərliyi dayanıqlı və davamlı rifaha nail oldu. Azərbaycanı günbəgün qüdrətləndirən Prezident İlham Əliyev apardığı siyasət nəticəsində Vətən müharibəsində qazanılan Zəfər ilə Ulu Öndərin ən böyük arzusunu gerçəkləşdirdi.
Sonda 120 nəfər müəllim və tələbəyə Yeni Azərbaycan Partiyasının üzvlük vəsiqələri təqdim edib.