MİLLİ QURTULUŞ GÜNÜNƏ HƏSR OLUNMUŞ MİNİ-FUTBOL TURNİRİ BAŞA ÇATMIŞDIR
Bakı, 16 iyun (AZƏRTAC). İqtisadi İnkişaf Nazirliyi birləşmiş həmkarlar ittifaqı komitəsinin (BHİK) təşkilatçılığı ilə nazirliyin qurumları arasında keçirilən və 15 İyun - Milli Qurtuluş gününə həsr olunmuş mini-futbol turniri başa çatmışdır.
11 komandanın iştirak etdiyi turnirin final görüşü Badamdar qəsəbəsindəki T.Məmmədov adına 239 nömrəli məktəbin yaşıl meydançasında olmuşdur. Burada İqtisadi İslahatlar Elmi Tədqiqat İnstitutunun (İİETİ) və nazirliyin xarici iqtisadi əlaqələr şöbəsinin komandaları qarşılaşmışlar. Gərgin idman mübarizəsi şəraitində keçən oyunun əsas vaxtında qapılara top vurulmamışdır. Turnirin qaydalarına əsasən təyin olunmuş cərimə zərbələrindən sonra İİETİ-nin idmançıları qalib gəlmişlər - 3:2.
Üçüncü yer uğrunda görüşdə isə “Ekspertiza” klubu Sahibkarlığa Kömək Milli Fondunun komandasını 8:0 hesabı ilə məğlub etmişdir.
İqtisadi inkişaf nazirinin müavini Niyazi Səfərov və BHİK-in sədri Fazil Məmmədov turnirdə ilk dörd yeri tutmuş komandaları təbrik etmiş, onlara diplom, pul mükafatı və hədiyyə təqdim etmişlər. Qalib komandaya, həmçinin keçici kubok verilmişdir.
######
 |
 |
Bölmənin digər xəbərləri
