İDMAN
Millinin baş məşqçisi: Atletlərimizin hər biri Qran-Pridə yaxşı çıxış etdi
Bakı, 14 dekabr, AZƏRTAC
“Qətərə 4 idmançı ilə yola düşmüşdük. Onların hər biri yaxşı çıxış etdi”.
Bu sözləri AZƏRTAC-a açıqlamasında ağırlıqqaldırma üzrə Azərbaycan millisinin baş məşqçisi Emil Əliyev Qətərin paytaxtı Dohada keçirilmiş II Qran-Pri yarışında idmançıların çıxışlarını şərh edərkən deyib.
46 yaşlı mütəxəssis Dadaş Dadaşbəylini qızıl medal qazanması münasibətlə təbrik edib: “O, bir qızıl və bir gümüş medal qazanaraq bayrağımızı ucaltdı və himnimizi səsləndirdi. Digər idmançılarımız da öz nəticələrini yaxşılaşdırdılar və reytinq xalları qazandılar”.
“Qarşıda lisenziya xarakterli iki əsas yarışımız qalıb. Atletlərimiz Avropa çempionatı və Dünya Kubokunda çıxış edəcəklər” - , deyə baş məşqçi əlavə edib.
Qeyd edək ki, D. Dadaşbəyli birdən qaldırmada 176 kiloqramı ram edib və bu hərəkətdə qızıl medal qazanıb. O, təkanla qaldırma hərəkətində isə 212 kiloqramı başı üzərinə qaldıraraq gümüş medala sahib çıxıb. Atlet yekun sıralamada da hamını qabaqlayıb və öz çəkisində qalib olub.