“Mines Action Canada” təşkilatı Fransa Azərbaycanlıları Koordinasiya Şurasının müraciətini cavablandırıb
Bakı, 21 avqust, AZƏRTAC
Kanadanın “Mines Action Canada” (MAC) aparıcı şirkətinin icraçı direktoru Erin Hant ölkəmizin azad olunmuş ərazilərində Ermənistan tərəfindən yaradılmış mina təhlükəsi barədə Fransa Azərbaycanlıları Koordinasiya Şurasının müraciətini cavablandırıb.
Bu barədə AZƏRTAC-a Diasporla İş üzrə Dövlət Komitəsindən bildirilib.
Azərbaycanda mina təhlükəsi ilə bağlı mövcud durum barədə məlumat verdiyi və bu məsələ ilə bağlı fikrini bölüşdüyü üçün Fransa Azərbaycanlıları Koordonasiya Şurasına minnətdarlığını bildirən Erin Hant cavabında yazıb ki, Kanada hökumətinin dəstəyi ilə MAC artıq bir neçə ildir Cənubi Qafqazda minaların təmizlənməsi prosesini müdafiə edir. Bu müdafiə aksiyasının 2021-ci ildə uğurlu olduğunu xatırladan icraçı direktor bildirib ki, tezliklə bu fəaliyyətin yenidən müvəffəqiyyətlə təkrarlanacağına ümid edir. O əlavə edib ki, şirkətləri Azərbaycan Respublikasının Minatəmizləmə Agentliyində (ANAMA) çalışan azərbaycanlı həmkarları ilə sıx işləyir.
Erin Hant vurğulayıb ki, bu ilin may ayında MAC adından Bakıya səfər edib və II Beynəlxalq humanitar mina fəaliyyəti konfransına qatılıb. Bu konfransın Bakı və Ağdamda keçirildiyini diqqətə çatdıran kanadalı mütəxəssis qeyd edib ki, minaların Azərbaycanda icmaların həyatına təsirini görə biliblər. Onun sözlərinə görə, Azərbaycanda mina təhlükəsi ilə bağlı öyrəndiklərini Kanada Hökumətinin və parlamentinin rəsmiləri ilə bölüşüb.
Bölmənin digər xəbərləri
