MƏDƏNİYYƏT
Mingəçevir Turizm Kolleci beynəlxalq əlaqələrin qurulmasında maraqlıdır
Bakı, 5 aprel, Günel Əfəndiyeva, AZƏRTAC
Artıq 3 ildir ki, ardıcıl olaraq “AİTF” sərgidə iştirak edirik. Sərgi bu il daha geniş coğrafiyanı əhatə edir. Bu, həm regionların, həm də xarici ölkələrin sərgiyə artan marağının göstəricisidir. Belə sərgilər Azərbaycanın tarixini, mədəniyyətini və inkişafını xarici vətəndaşlara təqdim etməyə, turizm imkanlarını beynəlxalq aləmdə tanıtmağa yaxşı imkan yaradır.
Bu sözləri AZƏRTAC-a eksklüziv müsahibəsində “AİTF-2015” 14-cü beynəlxalq “Turizm və səyahətlər” sərgisində iştirak edən Mingəçevir Turizm Kollecinin direktoru, iqtisad elmləri doktoru, professor Əyyub Əyyubov deyib.
Kollecin fəaliyyətindən söz açan Ə.Əyyubov bildirib ki, turizm sahəsi qeyri neft sektorunda iqtisadiyyatın inkişafı üçün ən perspektivli sahələrdəndir. Ölkəmizdə bu sahənin inkişafı üzrə geniş potensial imkanlar var. Yüksək səviyyəli xidmətlər göstərməyə malik olan istirahət məkanlarımız, sanatoriya komplekslərimiz mövcuddur.
Ə.Əyyubov bildirib ki, bu sahənin inkişafını təmin etmək üçün bacarıqlı mütəxəssislər tələb olunur. İxtisasının mahiyyətini, sosial mənasını dərindən dərk edən, Azərbaycan tarixinin əsas mərhələlərini, xronologiyasını bilən, ana dilində sərbəst danışan, standart və qeyri standart şəraitlərdə qərar qəbul edən, ixtisas səviyyəsini daim artıran, işin nəticəsinə görə məsuliyyəti öz üzərinə götürməyi bacaran, peşə vəzifəsini əxlaqi normalara və xidməti etikaya uyğun yerinə yetirən mütəxəssis hazırlayan Mingəçevir Turizm Kolleci yarandığı gündən öz fəaliyyətini güclü maddi-texniki bazanın və kadr potensialının hazırlanmasına, tədris intizamının formalaşmasına və beynəlxalq əlaqələrin qurulmasına yönəldib.
O qeyd edib ki, qısa müddətdə kollec həyata keçirilən məqsədyönlü tədbirlər nəticəsində xeyli uğurlara imza atıb. Hazırda kollecdə 12 ixtisas üzrə mütəxəssis hazırlanır.
Rəhbərlik etdiyi təhsil ocağının beynəlxalq əlaqələrindən söz açan Əyyub Əyyubov deyib ki, “AİTF” sərgisi gənc kadrların müasir dünya turizminin aparıcı şirkətlərini təmsil edən mütəxəssislərlə fikir mübadiləsi aparmağa imkan yaradır.
Bu sərgidə həm də, Mingəçeviri təmsil etdiklərini vurğulayan natiq Azərbaycanda keçirilən 2015-ci il ilk Avropa oyunlarında su idman növü üzrə yarışların bu şəhərdə təşkil olunacağını bildirib.
Ölkəmizin möhtəşəm tədbirlərə ev sahibliyi etməsini böyük fərəh hissi ilə qeyd edən alim deyib ki, Mingəçevir Turizm Kollecinin tələbələri və məzunları idman yarışlarında iştirak etmək üçün vətənimizə gələn qonaqlara bələdçi və tərcüməçi kimi könüllü olaraq xidmət edəcək.