MİNGƏÇEVİRDƏ OLİMPİYA İDMAN MƏKTƏBİ VƏ GƏNCLƏR MƏRKƏZİ AÇILACAQDIR
Mingəçevir, 13 aprel (AZƏRTAC). Mingəçevir Şəhər Gənclər və İdman İdarəsindən bildirmişdir ki, Yaşar Məmmədzadə adına şəhər stadionunda dövlət vəsaiti hesabına həyata keçirilən yenidənqurma işləri uğurla davam etdirilir.
İndiyədək stadionda 2 mindən çox plastik oturacaq quraşdırılmışdır. Təmir-bərpa işləri tamamlandıqdan sonra tamaşaçı yerlərinin sayı 5 minə çatdırılacaqdır.
Gələcəkdə stadionun böyük idman kompleksi kimi fəaliyyət göstərməsi üçün ərazidə geniş tikinti işləri aparılır. Burada güləş, boks, stolüstü tennis, şahmat və digər idman növlərinin tədrisi üçün olimpiya idman məktəbinin açılması nəzərdə tutulmuşdur. Yaxın günlərdə məktəbin təməli qoyulacaqdır. 2010-cu ildə Mingəçevirdə ilk dəfə gənclər mərkəzinin yaradılması və onun üçün yeni binanın tikilməsi üçün hazırlıq işləri də görülür.
Xatırladaq ki, ötən ay dövlətimizin başçısı İlham Əliyev Mingəçevirə səfər edərkən "Kür" Olimpiya tədris idman kompleksində və şəhər stadionunda işlərin yüksək keyfiyyətlə və vaxtında başa çatdırılması üçün müvafiq tapşırıqlar vermişdir.
Bölmənin digər xəbərləri
