Misirdə orta məktəblərdə buraxılış imtahanlarında COVID-19-a yoluxanlar var
Qahirə, 23 iyun, AZƏRTAC
Bazar günü Misirin orta məktəblərində keçirilən buraxılış imtahanlarında onlarla şagirdin COVID-19-a yoluxduğu bildirilir. AZƏRTAC xəbər verir ki, Baş Səhiyyə Sığortası İdarəsinin rəhbəri Məhəmməd Dahi ən azı üç yoluxma halının təsdiq olunduğunu bildirib. Karantin altına alınan şagirdlərin avqustda təkrar imtahan verəcəkləri bildirilir.
Misirin Təhsil Nazirliyinin icazəsi ilə keçirilən və 650 mindən çox şagirdin iştirak etdiyi imtahanlara 2500 təcili tibbi yardım maşını və həkimlər cəlb olunmuşdu. Lakin jurnalistlər və blogerlər bir çox yerlərdə sosial məsafə qaydalarına əməl olunmadığı barədə xəbərlər yayıb. İmtahandan əvvəl Misir Təbiblər Sindikatı və valideynlər imtahanların təxirə salınması, digərləri isə onlayn rejimdə keçirilməsi barədə çağırış etmişdilər.
Misir Səhiyyə Nazirliyinin son məlumatına görə, iyunun 22-də ölkədə daha 1576 nəfər COVID-19-a yoluxub, 85 pasiyent isə vəfat edib.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
