Misirdə “Sinovac” vaksininin istehsalına dair sazişlər imzalanıb
Qahirə, 22 aprel, AZƏRTAC
Misirin VACSERA farmasevtika firması ilə Çinin “Sinovac” biofarmasevtika şirkəti arasında COVID-19 əleyhinə “CoronoVac” vaksininin istehsalına dair iki saziş imzalanıb.
AZƏRTAC xəbər verir ki, Qahirədə keçirilən imzalama mərasimində çıxış edən Misirin Baş naziri Mustafa Mədbuli tezliklə istehsalına başlanacaq vaksinin daxili tələbatı təmin etməklə yanaşı, Afrika və Yaxın Şərq ölkələrinə ixrac ediləcəyini də bildirib.
Misirin səhiyyə naziri Halə Zayid jurnalistlərə məlumat verib ki, birinci sazişdə “Sinovac” şirkəti Misir paytaxtında yerləşən farmasevtika zavoduna vaksinin istehsalı üzrə qaydaları təqdim edəcək və müvafiq avadanlıqlar göndərəcək. İkinci sənəddə isə Çin şirkətinin VACSERA-ya vaksinin istehsalı, qablaşdırılması üzrə lisenziya verəcəyi nəzərdə tutulur. Bundan başqa, çinli mütəxəssislər Misirdəki zavodun işçiləri üçün treninqlər təşkil edəcəklər.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
