Misirli jurnalist: Erməni mənşəli Livan vətəndaşları Ermənistanın müharibə cinayətlərində iştirak ediblər
Qahirə, 28 iyun, AZƏRTAC
Yalan və faktların təhrif edilməsi işğalçı dövlətlərin xarakterik xüsusiyyətidir. Livan vətəndaşları olan muzdluları işğal etdiyi Azərbaycan torpaqlarına gətirən Ermənistan da bu qəbildəndir.
AZƏRTAC xəbər verir ki, bu fikirlər misirli jurnalist, “Rayət Masr” informasiya portalının baş redaktoru Məhəmməd Rəfat Fəraqın məqaləsində yer alıb. Müəllif yazıb: “Mən Livanın “23 News” telekanalının saytında “Livanlılar Azərbaycan torpağında zəlil olublar; onları xilas edin!” sərlövhəli məqalə oxudum. Yazıda qeyd olunub ki, livanlı muzdlular Azərbaycana qarşı təxribatlarda və terrorçuluqda təqsirləndirilir. Sonradan öyrəndim ki, Ermənistan işğal etdiyi ərazilərdə Azərbaycan əsgərlərinə qarşı döyüşmək üçün bir qrup livanlı gətirib. Bu barədə Livan saytları, qəzetləri də yazmışdı. Hərbi cinayətlərini ört-basdır etmək istəyən Ermənistan, eyni zamanda, müharibə zamanı Azərbaycana qarşı çirkin və yalanla dolu qarayaxma kampaniyası başlatdı”.
Müəllif vurğulayıb ki, bu cür cinayətlər törədən Ermənistan təxribatlar və terror aktları törətmək məqsədilə Azərbaycana göndərdiyi və tamamilə qanuni olaraq həbs edilmiş erməniləri hərbi əsir kimi qələmə verməyə çalışır. Misirli jurnalist daha sonra yazıb: “Daha bir yalan ermənilərin guya minalanmış ərazilərin xəritələri ilə bağlıdır. Məhz Ermənistandan gələn təxribatçıların basdırdığı minanın partlaması nəticəsində iki nəfər azərbaycanlı jurnalist həlak oldu. Əvvəlcə heç bir xəritənin olmadığını iddia edən erməni rəsmiləri, sonradan Ağdam rayonundan minalanmış ərazilərin xəritələrini təqdim etdilər. Lakin mən bir daha Livan telekanalının saytındakı yazıya qayıtmaq istəyirəm. Maraqlıdır, livanlıların Azərbaycan torpaqlarında nə işi var? Livan hökuməti nə üçün Beyrutda baş vermiş dəhşətli partlayışdan sonra bu ölkəyə yardım edən Azərbaycana öz vətəndaşlarının çirkin məqsədlər üçün göndərilməsinin qarşısını almayıb? Bu gün Azərbaycan tamamilə haqlı olaraq erməni mənşəli livanlıları mühakimə edir. Onlar işğalçı Ermənistanın müharibə cinayətlərində iştirak ediblər”.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
