Moldova Azərbaycanın sosial xidmətlərin vahid platformadan aparılması təcrübəsinin tətbiqində maraqlıdır
Bakı, 11 aprel, AZƏRTAC
Milli Məclisin Əmək və sosial siyasət komitəsinin sədri Musa Quliyev və komitənin üzvləri aprelin 11-də Moldovanın əmək və sosial müdafiə naziri Aleksey Buzunun rəhbərlik etdiyi nümayəndə heyəti ilə görüşüblər.
AZƏRTAC xəbər verir ki, komitə sədri Azərbaycanda son illər sosial siyasət sahəsində böyük uğurlar əldə edildiyini diqqətə çatdırıb. Musa Quliyev xüsusən də ölkəmizdə sosial sistemlərin optimallaşdırılması və müasirləşdirilməsi, sosial müdafiə və sosial texniki xidmət, avtomatlaşdırmanın tətbiqi və onlayn xidmətlərin genişləndirilməsi sahələrində görülən işlərdən danışıb. Ekspertiza və sosial xidmətlərin keyfiyyətinə toxunan komitə sədri pensiya və sığorta islahatlarının ölkəmizdə uğurla həyata keçirildiyini qeyd edib. O, Azərbaycanda şəhid ailələrinə, əlillərə və müharibə veteranlarına xüsusi diqqət yetirildiyini də diqqətə çatdırıb.
Son illər ölkələrimiz arasında əlaqələrin dinamik surətdə inkişaf etdiyini qeyd edən Musa Quliyev yüksək səviyyəli qarşılıqlı səfərlərin əlaqələrin inkişafında böyük rol oynadığını vurğulayıb.
Moldova parlamentinin komitə sədri Dan Perçun çıxışında Azərbaycanın sosial sahədə qazandığı uğurların və təcrübənin əhəmiyyətini qeyd edib. Moldovalı parlamentari DOST konsepsiyasından danışaraq bildirib ki, Moldova Azərbaycanın sosial xidmətlərin vahid platformadan və elektron qaydada aparılması təcrübəsinin tətbiqində maraqlıdır. Ölkələrimiz arasında əlaqələrin daim genişlənməsindən, ticarət mübadiləsinin həcminin artmasından məmnunluğunu ifadə edən D.Perçun əməkdaşlıq perspektivləri barədə fikirlərini bölüşüb.
Sosial sahədə Azərbaycanın uğurlarını yüksək qiymətləndirən Moldovanın əmək və sosial müdafiə naziri Aleksey Buzu azərbaycanlı həmkarlarından öyrənməli çox şeyin olduğunu vurğulayıb. Rəqəmsallaşmanın önəmini qeyd edən nazir ölkəsində son iki ildə həyata keçirilən gənc ailələrə dəstək proqramı barədə məlumat verib.
Söhbət zamanı regional əməkdaşlığın, iqtisadi əlaqələrin genişləndirilməsinin vacibliyi vurğulanıb.
Sonra Mili Məclisin Əmək və sosial siyasət komitəsinin üzvləri Ziyad Səmədzadə, Arzu Nağıyev, Sevinc Hüseynova, Milli Məclis Aparatının Sosial qanunvericilik şöbəsinin müdiri Adil Vəliyev ölkələrimiz arasında sıx münasibətlər, mövcud əlaqələrin dinamik inkişafı, ölkəmizin Vətən müharibəsindəki şanlı Qələbəsi barədə danışıblar.
Bölmənin digər xəbərləri
