SİYASƏT
MOSKVA-AZƏRBAYCAN HÖKUMƏTLƏRARASI KOMİSSİYANIN DÖRDÜNCÜ İCLASI KEÇİRİLMİŞDİR
Sentyabrın 28-də Nazirlər Kabinetində Azərbaycan Respublikası və Moskva hökumətləri arasında ticarət-iqtisadi, elmi-texniki və mədəniyyət sahələrində əməkdaşlıq haqqında sazişin yerinə yetirilməsi üzrə hökumətlərarası komissiyanın dördüncü iclası keçirilmişdir.
İclas başlanmazdan əvvəl Moskva hökuməti nümayəndə heyətinin üzvləri Şəhidlər xiyabanını ziyarət edərək, Azərbaycanın azadlığı, müstəqilliyi və ərazi bütövlüyü uğrunda canlarını qurban vermiş qəhrəmanların məzarları üstünə gül qoydular.
İclası komissiyanın həmsədrləri- Azərbaycan baş nazirinin birinci müavini Abbas Abbasov və Moskva hökumətində merin birinci müavini Lyudmila Şvetsova aparırdılar.
Abbas Abbasov iclası giriş sözü ilə açaraq, ticarət-iqtisadi, elmi-texniki və mədəni əlaqələrin inkişafı sahəsində komissiyanın son illər gördüyü iş barədə ətraflı məlumat verdi. O dedi ki, Azərbaycandan Moskvaya kənd təsərrüfatı məhsullarının göndərilməsi mexanizmini təkmilləşdirmək üçün ölkəmizin hökuməti göndərilən məhsula görə maliyyə vəsaitlərinin qaytarılmasına zəmanət verilməsi barədə təşəbbüsü qaldırmışdır. Bununla əlaqədar Rusiya paytaxtının meri Yuri Lujkov Moskva banklarına müvafiq göstəriş vermişdir. Bundan əlavə, oktyabr ayında Azərbaycan-Rusiya sərhəddində Rusiya və Azərbaycan gömrük orqanlarının birinci şəxslərinin, habelə Dağıstan rəhbərliyinin görüşü olacaq və sərhədlərin şəffaflığı məsələsi nəzərdən keçiriləcəkdir.
Lyudmila Şvetsova sərhəddə görüş keçirilməsi və maliyyə vəsaitlərinin qaytarılmasına zəmanət barədə Azərbaycan hökumətinin təşəbbüsünü yüksək qiymətləndirdi, elmi və mədəni sahələrdə əlaqələrin genişləndirilməsi məsələsi üzərində ətraflı dayandı.
Sonra iclasın gündəliyinə daxil edilmiş məsələlərin müzakirəsinə başlandı. Bildirildi ki, ötən dövr ərzində tərəflər ticarət-iqtisadi, elmi-texniki və mədəniyyət sahələrində əməkdaşlıq haqqında sazişin gerçəkləşdirilməsinə dair birgə tədbirlər planının yerinə yetirilməsi üçün müəyyən iş görülmüşdür. 2001-ci ildə Azərbaycan- Moskva xarici ticarət dövriyyəsi 28,7 milyon dollar təşkil etmişdir. Azərbaycandan 16,5 milyon, Moskvadan isə 12,2 milyon dollar dəyərində mal göndərilmişdir. Bu ilin altı ayı ərzində qarşılıqlı surətdə 14,5 milyon dollar dəyərində mal göndərilmişdir. Lakin bu, ikitərəfli münasibətlərin real iqtisadi potensialını əks etdirmir.
Ticarət-iqtisadi əməkdaşlığı inkişaf etdirmək məqsədi ilə Azərbaycan və Moskva hökumətlərinin müvafiq qurumlarına tapşırılmışdır ki, 2002-ci il dekabrın 1-dək təşkilatları və müəssisələri cəlb edərək, Azərbaycandan Moskvaya meyvə-tərəvəz göndərilməsinə dair birgə layihələrin işlənib hazırlanması və həyata keçirilməsi üçün işçi qrupu yaratsınlar. Bundan əlavə, Moskva hökumətinin Ərzaq ehtiyatları departamenti Azərbaycan tərəfinə 2002-2004-cü illər üçün topdansatış ticarətinin inkişafına və şəhərin meyvə-tərəvəz müəssisələri bazasında topdansatış ərzaq bazarlarının və bölüşdürücü mərkəzlərin yaradılmasına dair proqram təqdim etməlidir. Azərbaycan baş nazirinin birinci müavini Abbas Abbasov bildirdi ki, hökumət Moskva meri Yuri Lujkova müraciət edərək, Azərbaycan ticarət evinin tikintisi üçün Moskva şəhərinin ətrafında torpaq sahəsi ayrılmasını xahiş etmişdir.
İclasın gündəliyindəki növbəti məsələ müzakirə olunarkən tərəflər bildirdilər ki, Azərbaycanla Moskva arasında humanitar əməkdaşlıq qarşılıqlı anlaşmanın, etimadın və millətlərarası münasibətlərin möhkəmləndirilməsinin mühüm amili olaraq qalır. 2001-ci ildə Moskvanın “Modern” teatrında Bakının “İbrus” teatrının qastrolları keçirilmiş, Mərkəzi Dövlət Kütləvi Kitabxanasında isə Şəhriyar poeziya klubunun təqdimatı olmuşdur. Bu ilin yanvar və avqust aylarında Moskva Konservatoriyasının böyük salonunda Azərbaycanın xalq artisti Rauf Abdullayevin dirijorluğu ilə Rusiya Dövlət simfonik orkestrinin və Çaykovski adına Böyük akademik simfonik orkestrin konsertləri təşkil edilmişdir. Bundan əlavə, Dövlət keramika muzeyində və “XVIII əsr Kuskovo malikanəsi”ndə Azərbaycan xalçaları və xalq çalğı alətlərinin sərgisi keçirilmişdir. M.F.Axundov adına Azərbaycan Dövlət kitabxanasının kitab fondunu zənginləşdirmək üçün N.A.Nekrasov adına kitabxana və Moskva hökuməti arasında birbaşa əlaqələr yaradılmışdır.
Azərbaycanın Təhsil Nazirliyi ilə Moskva hökumətinin Təhsil Komitəsi arasında tədris ədəbiyyatı mübadiləsi təcrübəsi uğurla həyata keçirilir. Moskva Humanitar İnstitutunun əməkdaşları bu il iyunun 17-dən 19-dək Azərbaycan məktəblərində rus dilinin öyrənilməsi problemlərinə həsr olunmuş konfransda iştirak etmişlər.
İclas iştirakçıları gələn il Moskvada Azərbaycan Mədəniyyəti günlərinin keçirilməsinə hazırlıq işlərini və nəzərdə tutulan tədbirləri bəyəndilər. Hökumətlərarası komissiyanın növbəti iclasını 2003-cü ilin üçüncü rübündə Moskvada keçirmək də qərara alındı.
Axırda Abbas Abbasov və Lyudmila Şvetsova hökumətlərarası komissiyanın dördüncü iclasının protokolunu imzaladılar.