Moskva görüşü: Azərbaycan regionda sülhü təşviq edir
Bakı, 27 may, AZƏRTAC
Moskvada Ali Avrasiya İqtisadi Şurasının geniş tərkibdə iclasında Azərbaycan Prezidenti İlham Əliyev ölkəsinin regionda sülhü təşviq etdiyini və uğurlu iqtisadi inkişafa nail olduğunu gündəmə gətirdi. “Azərbaycan ilə Ermənistan arasında münasibətlərin normallaşdırılması üçün ərazi bütövlüyünün və suverenliyin qarşılıqlı şəkildə tanınması əsasında ciddi imkanlar var”, - deyə Prezident İlham Əliyev iclasdakı çıxışında vurğuladı. Sülh üçün bütün imkanlar olsa da, Ermənistan və onun havadarları prosesi uzatmağa səy göstərirlər. Ermənistan hərbi-siyasi rəhbərliyinin atdığı addımlar da bunu deməyə əsas verir. Ermənistanın baş naziri Nikol Paşinyanın hər dəfə fərqli fikir səsləndirməsi də sülhdən qaçmaq üçün hesablanmış bəhanələrdən başqa bir şey deyil. Azərbaycan ilə Ermənistan arasında münasibətlərin normallaşdırılması üçün ərazi bütövlüyünün və suverenliyin qarşılıqlı şəkildə tanınması əsasında ciddi imkanlar var. Bu ölkə Paşinyanın timsalında Azərbaycanın ərazi bütövlüyünü tanıyır.
Bunu AZƏRTAC-a açıqlamasında siyasi şərhçi Nicat İsmayılov söyləyib.
Ermənistanın daxilində Nikol Paşinyanın mövqeyinə ciddi təpki olduğunu vurğulayan siyasi şərhçi əlavə edib: “Qarabağdakı separatçıların da bu məsələyə ciddi müqavimət göstərmək istədikləri müşahidə olunur. Paşinyana kənar təhdidlər də var. Əslində, tərəflərin bir-birinin ərazi bütövlüyünü tanıması Prezident İlham Əliyevin də dediyi kimi, sülh üçün əsas ola bilər. Çünki bu məsələdən sonra o qədər ciddi problemlər qalmır. Amma görünən odur ki, elə Rusiyanın timsalında bölgədə tezliklə sülhə nail olunmasını istəməyən qüvvələr var. Həmin güclər Azərbaycan-Ermənistan münasibətlərinin normallaşmasında maraqlı deyil. Əgər problem həll olunacaqsa, bölgədə Rusiyanın nə hərbi, nə də siyasi mövcudluğuna ehtiyac qalmayacaq. Rusiya özü də bunun fərqindədir. Ona görə də zamanında Rusiyanın dəstəyi ilə Ermənistanda hakimiyyətə gələn və uzun müddət iqtidarda qalan qüvvələrin Paşinyana təzyiqi daha çoxdur. Onlar erməni ictimaiyyətini də Paşinyanın əleyhinə çevirməyə çalışırlar. Bundan əvvəlki təcrübə də göstərir ki, Paşinyan razı olduğu mövqedən bir çox hallarda geri çəkilir. Konfransdakı mövqeyi də, iclas zamanı Azərbaycan Prezidenti ilə polemikaya girməsi də onu deməyə əsas verir ki, Paşinyan həm erməni ictimaiyyəti qarşısında divident qazanmaq istəyirdi, həm də istənilən zaman mövqeyindən geri çəkilə biləcəyini göstərmiş oldu”.
Nicat İsmayılovun sözlərinə görə, Rusiya Prezidentinin dəvəti ilə qonaq qismində Ali Avrasiya İqtisadi Şurasının iclasında iştirak edən dövlətimizin başçısı bildirdi ki, Azərbaycan Ermənistan xaric üzv ölkələrlə sıx əməkdaşlıq əlaqələrinə malikdir.
Azərbaycanın həm enerji, həm də nəqliyyat layihələrinin icrasını uğurla həyata keçirməklə bu körpünün daha da möhkəmlənməsinə yeni əlavələr etdiyini vurğulayan siyasi şərhçi bəzi statistik rəqəmlərə nəzər salıb: “Ötən il Azərbaycanın Avrasiya İqtisadi Birliyi ilə əmtəə dövriyyəsi 31 faiz artıb və 4,7 milyard dollar təşkil edib. Bu ilin yanvar-aprel aylarında qarşılıqlı ticarətin həcmi daha 38 faiz artıb. Ötən il Avrasiya İqtisadi Birliyinə üzv ölkələrin Azərbaycanın xarici ticarət dövriyyəsində payı 9 faizə yaxın olub. Azərbaycan “Şərq-Qərb” və “Şimal-Cənub” nəqliyyat yollarının coğrafi kəsişməsində yerləşir. Ölkəmizin nəqliyyat-logistika infrastrukturu bütün istiqamətlərdə daşımaları həyata keçirməyə imkan verir. Azərbaycan Xəzərdə 50 gəmidən ibarət ən böyük ticarət donanmasına malikdir. On beş milyon ton yükün daşınmasına hesablanmış Ələt Dəniz Limanı yaxın vaxtlarda modernləşdiriləcək və yükaşırmaların həcmi 25 milyon tona çatacaq. Bakıda artıq bir neçə ildir bütün növ gəmilər hazırlaya bilən müasir gəmiqayırma tərsanəsi fəaliyyət göstərir. Azərbaycanın gəmiqayırma imkanları bu gün, həmçinin bizim Xəzərdəki qonşularımıza da təqdim olunub. Bakı gəmiqayırma zavodunda Xəzər üzrə qonşularımızın sifarişlərinin qəbul edilməsi üzrə danışıqlar və fəal iş aparılır. Bakı-Tbilisi-Qars dəmir yolu Avropaya, həmçinin Türkiyənin Aralıq dənizi limanlarına çıxışı təmin edir. Bu gün Azərbaycanda 8 beynəlxalq aeroport fəaliyyət göstərir ki, onlardan ikisi işğaldan azad olunmuş torpaqlarda - Füzuli və Zəngilan rayonlarında son iki ildə inşa edilib. İşğaldan azad olunmuş Laçında hazırda doqquzuncu beynəlxalq aeroport tikilir və 2025-ci ildə istismara veriləcək. Bütün bunların nəticəsidir ki, ölkəmiz illik 500 min ton yük dövriyyəsi ilə regionda ən iri hava yük donanmasına malikdir. Azərbaycan, həmçinin strateji əhəmiyyət daşıyan bir çox beynəlxalq logistik layihələrin, o cümlədən “Şimal-Cənub” nəqliyyat dəhlizinin fəal iştirakçısıdır. Cənab Prezident İlham Əliyevin dediyi kimi, Azərbaycan tam iqtisadi müstəqilliyə nail olub və bu, dövlətimizin uğurla həyata keçirdiyi müstəqil xarici siyasət kursunu aparmaq imkanına sahib ola bilmək üçün tələb olunan ən mühüm amillərdən biridir”.
N.İsmayılov vurğulayıb ki, rəqəmlərə qısa baxış Azərbaycanın dayanıqlı inkişafı üçün geniş imkanların mövcud olduğunu və əməkdaşlığın coğrafiyasının genişlənməsində həlledici rol oynadığını deməyə əsas verir.
Bölmənin digər xəbərləri
