MOSKVADA AZƏRBAYCANDA PARLAMENT SEÇKİLƏRİNƏ HƏSR OLUNMUŞ MƏTBUAT KONFRANSI KEÇİRİLMİŞDİR
Azərbaycan səfiri noyabrın 6-da keçirilmiş seçkilərə hazırlıq kampaniyası və seçkilərin gedişi barədə jurnalistlərə məlumat vermişdir. R.Rizayev demişdir ki, budəfəki seçkilər seçicilərin fəallığı və qeydiyyata alınmış namizədlərin, habelə beynəlxalq müşahidəçilərin sayına görə əvvəlkilərdən fərqlənirdi. Son iki ildə ölkə rəhbərliyi qanunvericilik bazasını beynəlxalq birliyin qəbul etdiyi demokratik prinsiplərə maksimum yaxınlaşdırmaq üçün nəzərəçarpacaq dəyişikliklər həyata keçirmişdir. Səfir bu baxımdan ölkə Prezidentinin cari il mayın 11-də və oktyabrın 25-də imzaladığı Sərəncamları, habelə Seçki Məcəlləsinə edilmiş və bir çox ölkələr, demokratik təsisatlar tərəfindən böyük rəğbətlə qarşılanmış dəyişiklikləri misal gətirmişdir. Diplomat demişdir: “Dövlətimizin başçısının gördüyü bütün bu tədbirlər parlament seçkilərinin demokratik, sərbəst və şəffaf şəraitdə keçirilməsinə imkan vermişdir və müşahidəçilərin əksəriyyəti seçkilərin gedişindən və insan hüquqlarına riayət olunmasından razı qalmışdır. Prezident İlham Əliyev bu seçkilərin demokratik standartlara cavab verməsi üçün çox səy göstərirdi və onun gərgin fəaliyyəti sayəsində seçkiləri ədalətli və şəffaf şəraitdə keçirmək mümkün olmuşdur”. R.Rizayev bildirmişdir ki, müşahidəçilər seçkilərin gedişi zamanı bir sıra pozuntular da qeydə almışlar. İqtidar buna dərhal öz münasibətini bildirmişdir və seçki qanunvericiliyini pozanlara qarşı ən kəskin inzibati tədbirlər, lazım gələrsə cəza tədbirləri görüləcəkdir.
Səfir seçkilər ərəfəsində dövlət çevrilişi cəhdinin qarşısının alınması barədə suala cavab verərək demişdir ki, bu dövlət çevrilişi çoxdan hazırlanırdı və əgər Azərbaycanın xüsusi xidmət orqanları tərəfindən ifşa olunmasaydı, necə nəticələnəcəyi məlum deyildi. Hakimiyyətin zorla devrilməsinin qarşını ala bilmiş Azərbaycanın xüsusi xidmət orqanlarının və ölkə rəhbərliyinin işini xüsusi qeyd etmək lazımdır. Həbs olunan insanlar yaxşı anlayırdılar ki, onlar yeni komanda ilə işləyə bilməyəcəklər, buna görə də ehtiyat variantı hazırlamışdılar.
Ramiz Rizayev ölkəmizdə keçirilmiş parlament seçkilərindən sonra Rusiya-Azərbaycan ikitərəfli münasibətlərinin necə inkişaf edəcəyi barədə suala cavabında demişdir ki, Rusiya-Azərbaycan siyasi və iqtisadi münasibətləri çox yüksək səviyyədədir və qarşılıqlı fəaliyyətin bütün sahələrində yüksələn xətlə inkişaf edir. Bu il əmtəə dövriyyəsi 1 milyard dollara çatacaqdır, halbuki 2003-cü ildə bu göstərici təxminən 350 milyon dollar təşkil edirdi. Diplomat demişdir: “Bizim çox səmimi və sivilizasiyalı münasibətlərimiz, yaxşı əməkdaşlıq perspektivlərimiz var və Rusiya-Azərbaycan münasibətlərini poza biləcək heç bir şey yoxdur. Xüsusi qeyd etmək istəyirəm ki, Rusiya müşahidəçiləri Azərbaycanda keçirilmiş parlament seçkilərini obyektiv qiymətləndirmiş və onların beynəlxalq standartlara uyğunluğunu təsdiq etmişlər”.
