MOSKVADA NARKOTİKLƏRƏ DAİR ÜMUMDÜNYA MƏRUZƏSİNİN TƏQDİMATI OLACAQDIR

21.06.2006 [19:48]
Çap et
A⁺ A^-

AZƏRTAC-ın xüsusi müxbiri xəbər verir ki, iyunun 26-27-də Moskvada xarici işlər nazirləri səviyyəsində “Əfqanıstandan narkotiklərin daşınması yolları haqqında” (“Paris 2-Moskva 1”) mövzusunda ikinci konfrans keçiriləcəkdir. Rusiya XİN-in və BMT-nin Narkotiklər və Cinayətkarlıq üzrə İdarəsinin birgə təşkilatçılığı ilə keçirilən konfransa 50 dövlətdən və 23 beynəlxalq təşkilatdan nümayəndələr dəvət olunmuşdur. Tədbirdə Azərbaycan xarici işlər və daxili işlər nazirliklərinin təmsilçilərindən ibarət nümayəndə heyəti də iştirak edəcəkdir.

Rusiya XİN-in İnformasiya və mətbuat departamentindən AZƏRTAC-ın müxbirinə bildirmişlər ki, konfrans 2003-cü ildə Parisdə keçirilmiş analoji tədbirdə təklif olunmuş “Praqa prosesi”nin icmalına, gələcək üçün öncül istiqamətlərin və başlıca məqsədlərin müəyyən edilməsinə həsr olunacaqdır. Əfqanıstan ərazisindən gələn transsərhəd narkotik təhlükəsinə qarşı mübarizənin konkret istiqamətləri də nəzərdən keçiriləcəkdir.

Konfrans çərçivəsində narkotiklər haqqında ümumdünya məruzəsinin təqdimatı olacaqdır. Məruzəni BMT baş katibinin müavini, BMT Narkotiklər və Cinayət üzrə İdarəsinin icraçı direktoru Antonio Maria Kosta təqdim edəcəkdir.

MOSKVADA NARKOTİKLƏRƏ DAİR ÜMUMDÜNYA MƏRUZƏSİNİN TƏQDİMATI OLACAQDIR

MÜƏLLİFLƏ ƏLAQƏ