MOSKVADA YAŞAR QARAYEVİN 70 İLLİK YUBİLEYİNƏ HƏSR OLUNMUŞ “DƏYİRMİ MASA” KEÇİRİLMİŞDİR
“Dəyirmi masa”da “Yaşar Qarayev və müasir Azərbaycan cəmiyyətində ziyalıların rolu” mövzusunda söhbət getmişdir.
“Ocaq” cəmiyyətinin və Azərbaycan Yazıçılar Birliyi Moskva bölməsinin sədri Tofiq Məlikli Y.Qarayevin elmi və ictimai fəaliyyətindən söhbət açmışdır. Natiq Azərbaycan cəmiyyətinin inkişafının yeni mərhələsi olan ötən əsrin 1990-cı illərində ictimai təfəkkürün formalaşmasında professor Y.Qarayevin rolunu xüsusi vurğulamışdır. T.Məlikli bildirmişdir ki, “azərbaycançılıq” ideologiyasının cəmiyyətimizə daxil olması da bir çox cəhətdən alimin adı ilə bağlıdır.
Tədbirdə çıxış edən professor Qasım Kərimov, dosent Çingiz Dadaşov, politoloq Ramiz Abutalıbov, şair Nəsib Nəbioğlu, yazıçı İlham Bədəlbəyli və başqaları çıxışlarında Y.Qarayevin Azərbaycanın filologiya, tarix və fəlsəfə elmlərinə böyük töhfəsini diqqətə çatdırmışlar. Qeyd olunmuşdur ki, o, yaradıcılığı və həyat mövqeyi ilə Vətəninin taleyində öz tarixi rolunu dərk edən vətənpərvər ziyalı nümunəsi olmuş və həmişə də olacaqdır.
Y.Qarayev “Uzaq və yaxın tarix”, “XIX-XX əsrlər: Azərbaycan ədəbiyyatı tarixi”, “Səhnəmiz və müasirlərimiz”, “Meyar şəxsiyyətdir” kimi sanballı əsərlərin müəllifidir.
