MÜDAFİƏ NAZİRLİYİ MƏTBUAT XİDMƏTİNİN M Ə L U M A T I
Müdafiə sahəsində iki tərəfli ABŞ-Azərbaycan məsləhətləşmə qrupunun üzvləri martın 26-da Vaşinqtondan Bakıya gəlmişdir.
Məsləhətləşmə qrupuna ABŞ müdafiə nazirinin Beynəlxalq Təhlükəsizlik siyasəti üzrə müavininin Avrasiya üzrə nümayəndəsi xanım Mira Rikardel rəhbərlik edir.
İkitərəfli məsləhətməşmələr martın 27-28-də Müdafiə Nazirliyində aparılacaqdır. Məsləhətləşmələrin sonunda birgə bəyanatın imzalanması planlaşdırılır.
X X X
Martın 26-da Azərbaycan Respublikasının Müdafiə naziri general-polkovnik Səfər Əbiyev Finlandiya Respublikasının Azərbaycan Respublikasındakı fövqəladə və səlahiyyətli səfiri cənab Timo Aleks Lahelmanı qəbul etmişdir.
Qonağı salamlayan Müdafiə naziri onun yeni təyinatı münasibətilə təbrik etmiş və Azərbaycan-Finlandiya münasibətlərinin inkişafında uğurlar arzulamışdır.
Səmimi qəbul üçün general-polkovnik S.Əbiyevə təşəkkür edən T.A.Lahelma ölkəsinin inkişaf tarixi, Finlandiya müdafiə sisteminin həmişə müstəqil olması, Silahlı Qüvvələrinin NATO standartlarına yaxınlığı və onunla sıx münasibətləri barədə ona ətraflı məlumat vermişdir.
Sonra o, Finlandiya-Azərbaycan hərbi münasibətlərinin yaradılması və inkişaf etdirilməsi arzusunda olduğunu açıqlamışdır. O demişdir: “Ordu quruculuğu sahəsində bir-birinin nailiyyətləri ilə tanış olmaq üçün zabit heyətlərinin qarşılıqlı səfərlərinin həyata keçirilməsi məqsədəuyğun olardı”.
General-polkovnik S.Əbiyev qonağı Cənubi Qafqaz regionunda mövcud olan hərbi-siyasi vəziyyətlə tanış etmiş, Ermənistan-Azərbaycan müharibəsinin tarixi kökləri və nəticələri haqqında ona məlumat vermişdir. O demişdir: ”Qafqazda heç zaman erməni dövləti olmayıb. 1828-ci ildə Çar Rusiyasının qərarı ilə Azərbaycanın İrəvan və Naxçıvan xanlıqlarının ərazisində “erməni vilayəti” yaradılmışdır. Onun əhalisinin 90 faizini azərbaycanlılar, 7-8 faizini ermənilər, qalanını isə başqa millətlər təşkil edirdi. Ərazisi isə 9 min kvadratmert olmuşdur. O, zamandan bəri Ermənistanın ərazisi Azərbaycan torpaqlarının hesabına 29,9 min kvadrat kilometrə çatdırılmışdır. 1923-cü ildə Stalinin iradəsi ilə Azərbaycanın Zəngəzur torpaqları Ermənistana birləşdirilmişdir. Beləliklə, Naxçıvan Azərbaycandan ərazi baxımından ayrı düşmüşdür. Ermənistan Respublikasının hesabına Türkiyə ilə keçmiş Sovet İttifaqı arasında “bufer zona” yaradılmışdır.
Ermənilər Dağlıq Qarabağa da 1828-ci ildə göçürülüb. 1923-cü ildə Sovet rəhbərliyinin dəstəyi ilə Dağlıq Qarabağ Muxtar Vilayəti yaradılıb. SSRİ dağıldıqda isə Ermənistan Dağlıq Qarabağı özünə birləşdirmək üçün elan olunmamış müharibəyə başladı və öz tarixi havadarlarının köməyi ilə Azərbaycan torpaqlarının 20 faizini işğal etdi.
Azərbaycan heç zaman Dağlıq Qarabağın Ermənistan tərəfindən işğalı ilə razılaşmayacaqdır. Ermənistan münaqişənin həllində destruktiv mövqe tutaraq təxribatçılıq siyasəti yürüdüb və Azərbaycanı yeni müharibəyə cəlb etmək istəyir. Belə olarsa, onu heç bir qüvvə məğlubiyyətdən xilas etməyəcəkdir”.
Sonra general-polkovnik S.Əbiyev səfir T.A.Lahelmanı maraqlandıran suallara cavab vermişdir.
Bölmənin digər xəbərləri
