SİYASƏT
MÜDAFİƏ NAZİRLİYİ MƏTBUAT XİDMƏTİNİN MƏLUMATI
Martin 12-də Azərbaycan Respublikasının müdafiə naziri general-polkovnik Səfər Əbiyev Amerika Birləşmiş Ştatları Hərbi Hava Qüvvələri Kollecinin müəllim və dinləyicilərindən ibarət nümayəndə heyətini qəbul etmişdir.
Qonaqları salamlayan general-polkovnik S.Əbiyev demişdir ki, biz nümayəndə heyətinin səfərinə böyük əhəmiyyət veririk, çünki Siz öz gözlərinizlə görürsünüz ki, Azərbaycan Respublikası müstəqillik illərində hansı nailiyyətləri əldə etmişdir. Azərbaycan dünyanın təhlükəsizlik strukturlarına inteqrasiyasını davam etdirir, bu istiqamətdə NATO və ABŞ-la əməkdaşlığa xüsusi əhəmiyyət verir. Bu əməkdaşlıq daha da genişlənməli və dərinləşməlidir. Sizin nümayəndə heyətinin səfəri də bu baxımdan çox faydalıdır. Arzu edərdim ki, bizim Silahlı Qüvvələrin nümayəndələri də Sizin Kollecdə təhsil alsınlar.
Nümayəndə heyətinin rəhbəri Con Cocerst səmimi sözlər və qəbul üçün müdafiə nazirinə Kollec rəisinin adından təşəkkür etmişdir. O qeyd etmişdir ki, Qafqaz regionuna səfər nümayəndə heyəti üçün olduqca maraqlıdır.
Sonra nümayəndə heyəti üzvlərinin suallarını cavablandıran general-polkovnik S.Əbiyev bu gün Cənubi Qafqaz regionunda mövcud olan hərbi-siyasi vəziyyətlə onları ətraflı tanış etmişdir. O demişdir: “Regionda işğalçılıq siyasəti yeridən Ermənistan Respublikası separatçılığı və terrorizmi dəstəkləyən bir dövlət imici qazanmışdır. Ermənistan işğal etdiyi Azərbaycan ərazilərində külli miqdarda uçotsuz və nəzarətsiz silah və texnika toplamış, onları buradan PKK terrorçularına ötürür”.
Başqa bir suala cavab verən müdafiə naziri demişdir: “Azərbaycan bəyan etmişdir ki, onun ABŞ-la əlaqələri strateji tərəfdaşlıq xarakter daşıyır və NATO ilə əməkdaşlığını durmadan davam etdirəcəkdir. Bu bəyanat bəzi dövlətləri narahat etsə də Azərbaycan rəhbərliyi bu istəyini gizlətmir.
Biz Azərbaycan Silahlı Qüvvələrinin quruculuğunu NATO standartlarına uyğun şəkildə davam etdiririk. Başqa sözlə, Silahlı Qüvvələrimizdə təhsil sistemi NATO standartlarına uyğun yenidən qurulmuş və biz məktəblərimizdə dünya hərb elminin müasir tələblərinə cavab verən zabit kadrları hazırlayırıq”.
General-polkovnik S.Əbiyev qonaqlardan birinin Naxçıvanın təhlükəsizliyi barədə sualına cavab verərkən demişdir: “Qafqazda heç zaman Ermənistan dövləti olmamışdır. Çar Rusiyası 1828-ci ildə Azərbaycanın Naxçıvan və İrəvan xanlıqlarının ərazisi hesabına “erməni vilayəti”ni yaratdı. İrandan və digər dövlətlərin ərazisindən buraya zorla erməni ailələri köçürülüb yerləşdirildi. “Erməni vilayəti”nin ərazisi 9 min kvadrat kilometrdən bir az çox, əhalisinin əksəriyyəti isə azərbaycanlılar idi. Qafqazda sovet rejimi qurulduqdan sonra Azərbaycanın Zəngəzur vilayəti də zorla Azərbaycandan qoparılıb Ermənistana verildi. Beləliklə, Naxçıvan Azərbaycandan ayrı salındı. Bu gün Ermənistanda “Naxçıvan” cəmiyyəti yaradıb hay-küy qoparırlar ki, guya Naxçıvan ermənilərin qədim torpağıdır. Bununla da Ermənistan Azərbaycana qarşı yeni ərazi iddiaları ilə çıxış edərək regionda öz işğalçılıq siyasətini davam etdirir”.
S.Əbiyev daha sonra demişdir: “Azərbaycan xalqı Ermənistanın işğalçılıq siyasətindən və erməni terrorundan çox bəlalar çəkmişdir. Buna görə də Azərbaycan antiterror əməliyyatlarında iştirakını sonadək davam etdirmək əzmindədir”.