Müəllimlər müasir təlim texnikaları barədə məlumatlandırılıblar
Bakı, 20 dekabr, AZƏRTAC
Azərbaycan Universitetində müəllimlər üçün “Müasir interaktiv təlim metodları” mövzusunda təlim keçirilib. “Azərbaycan universitetlərində tədris və təlimin təkmilləşdirilməsi” layihəsi çərçivəsində təşkil olunan təlimi Azərbaycan Universitetinin rektorunun məsləhətçisi Əli Həsənov, beynəlxalq əlaqələr şöbəsinin müdiri Bəxtiyar Bədəlov, sosial iş fakültəsinin dekanı Aygün Musayeva və monitorinq üzrə mütəxəssis Elçin Cəfərov aparıblar.
Universitetdən AZƏRTAC-a bildiriblər ki, təlimdə klassik və müasir təlim metodları qarşılıqlı müqayisə olunub. İştirakçılar öyrənmə tipləri və məlumatın ötürülməsi üsulları barədə məlumatlandırılıblar. Vurğulanıb ki, müasir çağırışlarda müəllimdən mühazirəçi yox, fasilitator olması gözlənilir.
Sonda müasir interaktiv təlim texnikalarının hər biri haqqında ətraflı məlumat təqdim olunub. Qeyd edilib ki, bu texnikalar tədrisin səmərəliliyinə müsbət təsir göstərir.
Bölmənin digər xəbərləri
