MÜĞƏNNİ MARİ TRİNTİNANIN QATİLİNƏ 8 İL HƏBS CƏZASI VERİLMİŞDİR
AZƏRTAC-ın xüsusi müxbiri Parisdən xəbər verir ki, martın 29-da Vilnüs şəhər məhkəməsi həmvətəni və məşuqəsi Mari Trintinanı qətlə yetirmiş Bertran Kantaya 8 il həbs cəzası verilməsi barədə qərar çıxarmışdır. Marinin ailəsi hakimin bu qərarına etiraz edərək, dövlət ittihamçısının tələb etdiyi kimi, qatilə 9 il həbs cəzası verilməsini tələb etmişdir. Hər iki ölkə arasında imzalanmış hüquq konvensiyasından çıxış edən Bertranın vəkili onun həbs cəzasını vətəni Fransada çəkməsi barədə xahişlə müvafiq orqanlara müraciət etməyi qərara almışdır.
Xatırladaq ki, Litvaya qastrol səfərinə gəlmiş 41 yaşlı fransız müğənnisi Mari Trintinan ötən ilin avqust ayının 1-də Vilnüsdə mehmanxanada Bertran Kanta tərəfindən vəhşicəsinə qətlə yetirilmişdir.
Bölmənin digər xəbərləri
