Murmanskdakı Azərbaycan diasporu Respublika Gününü qeyd edəcəkdir
Bakı, 22 may (AZƏRTAC). Murmanskda Azərbaycan Xalq Cümhuriyyətinin yaranmasının 94-cü ildönümünə həsr olunmuş konfrans keçiriləcəkdir.
Ümumrusiya Azərbaycan Konqresinin regional nümayəndəliyi tərəfindən təşkil olunmuş konfrans çərçivəsində kitab sərgisi də keçiriləcəkdir.
1918-ci il mayın 28-də Azərbaycan xalqının Vətənin azadlığı və müstəqilliyi ilə bağlı arzusu həyata keçmişdir.
Azərbaycan Xalq Cümhuriyyəti müsəlman dünyasında ilk dünyəvi demokratik respublika olmuşdur. Dünya birliyi AXC-nin suverenliyini tanımışdır.
AXC seçki hüququ, qadınların seçib-seçilmək hüququ, Bakı Dövlət Universitetinin yaradılması, habelə Azərbaycan dövlət simvollarının qəbul edilməsi barədə qərarlar qəbul etmişdir.
AXC cəmi 23 ay mövcud olmuşdur... 1920-ci il aprelin 28-də Qızıl ordu Azərbaycana soxulmuşdur. Azərbaycan 75 il SSRİ tərkibində olsa da, demokratik dəyərlər və müstəqillik ruhu Azərbaycan xalqının qəlbindən heç zaman silinməmişdir.
Murmansk vilayətinin qubernatoru yanında Millətlərin İşləri üzrə Məşvərət Şurasının üzvü Əlihüseyn Şükürov AZƏRTAC-a bildirmişdir ki, tədbirə hökumətin və bələdiyyə orqanlarının üzvləri, Murmansk vilayəti Milli Mədəniyyət Mərkəzinin rəhbərliyi və üzvləri, jurnalistlər və başqaları dəvət almışlar.
Bölmənin digər xəbərləri
