Azərbaycan Respublikasının Dövlət Müstəqilliyinin onuncu ildönümü münasibətilə “Müstəqil Dövlətimiz və Parlamentimiz” kitabı Azərbaycan və ingilis dillərində bir cilddə nəfis şəkildə çapdan çıxmışdır. 

Nəşrin məsul redaktoru Milli Məclisin sədri, Hüquq Elmləri Doktoru, professor Murtuz Ələsgərov, tərtibçilər Milli Məclisin mətbuat xidməti şöbəsinin müdiri, Filologiya elmləri doktoru Aqşin Babayev, redaksiya-nəşriyyat şöbəsinin müdiri Hafiz Babayevdir. İngilis dilinə mətni Milli Məclisin beynəlxalq münasibətlər şöbəsinin müdiri Azər Qasımov tərcümə etmişdir.

Elmi ictimaiyyət və ümumən geniş oxucu kütləsi üçün nəzərdə tutulan bu kitab Azərbaycan Prezidenti Heydər Əliyevin fotoşəkili, dövlətimizin başçısının “Müstəqil Azərbaycan on ildir yaşayır və bundan sonra on illər də yaşayacaq, əbədiyyətə qədər yaşayacaqdır” sözləri, Azərbaycan Respublikasının dövlət bayrağının və gerbinin şəkli ilə açılır.

Kitabın əvvəlində Azərbaycan Respublikası Prezidentinin “Azərbaycan Respublikasının dövlət müstəqilliyinin onuncu ildönümü haqqında” 2001-ci il 20 mart tarixli Fərmanının mətni, Azərbaycan Respublikasının dövlət müstəqilliyinin onuncu ildönümünə həsr olunmuş təntənəli mərasimdə Azərbaycan Respublikasının Prezidenti Heydər Əliyevin nitqi verilmişdir.

Milli Məclisin sədri Murtuz Ələsgərovun “Müstəqil dövlətimiz və parlamentimiz 83 il öncə və bu gün”, Milli Məclisin deputatı, AŞPA-da Azərbaycanın parlament nümayəndə heyətinin rəhbəri İlham Əliyevin “Azərbaycan nümayəndə heyəti Avropa Şurasının Parlament Assambleyasında”, Milli Məclis sədrinin birinci müavini Arif Rəhimzadənin “Qurtuluşdan tərəqqiyə”, Milli Məclis sədrinin müavinləri Ziyafət Əsgərovun “Dövlət müstəqilliyimizin onuncu ildönümü - Azərbaycan parlamenti müasir mərhələdə”, Gövhər Baxşəliyevanın “Parlamentimiz və qadın deputatlar”, Milli Məclisin deputatı Nizami Xudiyevin “Dahi xilaskar”, Prezidentin İcra Aparatının şöbə müdirləri Novruz Məmmədov və Əli Həsənovun “Azərbaycan Respublikasının xarici siyasəti müstəqilliyimizin və dövlətçiliyimizin əbədiliyinin qarantıdır”, milli siyasət məsələləri üzrə dövlət müşaviri Hidayət Orucovun “Müstəqilliyimiz və milli siyasətimiz”, Milli Məclisin deputatı Yaqub Mahmudovun “Azərbaycanın dövlətçilik və parlamentarizm ənənələri tarixindən” və digər məqalələr oxuculara ətraflı məlumat verir.

1918-20-ci illəri Azərbaycan xalqının siyasi şüurunun təşəkkül tapdığı, milli özünüdərk proseslərinin vüsət aldığı dövr kimi səciyyələndirən, Azərbaycan Xalq Cümhuriyyətinin məhrumiyyətlərlə dolu olan çox mürəkkəb tarixi şəraitdə meydana gəldiyini xatırladan müəlliflər vurğulayırlar ki, Şərqdə ilk dəfə qurulmuş demokratik respublika süquta uğrasa da, azadlıq ruhu, müstəqillik ideyası xalqımızı heç zaman tərk etməmiş, 1991-ci ildə sovet imperiyasının dağılması nəticəsində Azərbaycan yenidən öz istiqlalına qovuşmuşdur. Müstəqilliyin ilk illərində Azərbaycanda baş verən hadisələr 1918-20-ci illərdə cərəyan edən hadisələrin təxminən eyni idi. Azərbaycan çox mürəkkəb problemlərlə qarşılaşaraq çıxılmaz vəziyyətə düşmüşdü.

Lakin bu dəfə xalqımızın xoşbəxtliyi onda oldu ki, Azərbaycan dövlətçiliyinin müqəddəratının həll edildiyi 1993-cü ilin iyun günlərində Heydər Əliyev xalqın təkidli tələbi ilə yenidən hakimiyyətə qayıtdı, Azərbaycanın parçalanıb dağılmasının qarşısını aldı və onu dəhşətli fəlakətlərdən xilas etdi. Heydər Əliyevin zəngin siyasi təcrübəsi, misilsiz idarəçilik məharəti, möhkəm qətiyyəti, əzmkarlığı sayəsində dövlətçiliyimizin, müstəqilliyimizin əbədiliyi təmin olundu.

Ölkədə möhkəm ictimai-siyasi sabitlik yaradıldı. Xəzərin Azərbaycan sektorundakı enerji ehtiyatlarının işlənilməsi üçün dünyanın iri şirkətləri ilə sazişlər imzalandı, yeni neft strategiyası öz bəhrələrini verməyə başladı.

Müstəqil dövlətimizin yeni Konstitusiyası qəbul edildi, demokratik şəraitdə Prezident, parlament və bələdiyyə seçkiləri keçirildi. Qanunun aliliyinin təmin edilməsi, insan hüquqları və azadlıqlarının qorunması ilə məşğul olan təsisatlar yaradıldı.

Respublikamız dünya proseslərinə təsir göstərə bilən böyük iqtisadi layihələrin təşəbbüsçüsü və fəal iştirakçısı oldu. Ölkəmiz tarixi İpək Yolunun bərpası, Bakı-Tbilisi-Ceyhan neft kəmərinin və Bakı-Tbilisi-Ərzurum qaz kəmərinin çəkilməsi layihələrinin mərkəzinə çevrildi. Azərbaycan Prezidenti Heydər Əliyevin sözləri ilə desək, “tarixən çox qısa bir müddət ərzində biz qabaqcıl Avropa təcrübəsinə əsaslanaraq, çox şeyə nail ola bildik. Biz bütün çətinliklərə baxmayaraq, liberal iqtisadiyyat və sivil cəmiyyət quruculuğu yolu ilə irəlilədik. Biz demokratiyanın inkişafı üçün mühüm şərtlərdən olan daxili sabitliyə nail olduq. Biz azad söz, azad mətbuat və çoxpartiyalı siyasi sistem yaratdıq”.

Azərbaycan BMT-nin, ATƏT-in, Avroatlantika Tərəfdaşlıq Şurasının, Qara Dəniz İqtisadi Əməkdaşlıq Təşkilatının, İslam Konfransı Təşkilatının, Müstəqil Dövlətlər Birliyinin, İqtisadi Əməkdaşlıq Təşkilatının və bir sıra digər nüfuzlu beynəlxalq təşkilatların bərabər hüquqlu üzvü, GUÖAM regional qurumunun təşəbbüsçüsü və fəal iştirakçısıdır.

2001-ci il yanvarın 25-də Azərbaycan Respublikasının Prezidenti Heydər Əliyevin iştirakı ilə Strasburqda Avropa Şurasının binası önündə müstəqil dövlətimizin üçrəngli bayrağının ucaldılması Azərbaycanın Avropa ailəsinə qovuşduğunu bütün dünyaya nümayiş etdirdi.

Kitabda XX əsrin əvvəllərində azərbaycanlı deputatların parlament fəaliyyətindən, Azərbaycan Xalq Cümhuriyyətinin parlament təcrübəsindən, sovet hakimiyyəti illərində Azərbaycanda qanunvericilik işindən, Azərbaycan Milli Məclisinin regional parlament təşkilatları ilə əlaqələrindən də geniş bəhs olunmuşdur.

Milli Məclisin mətbəəsində çap olunmuş kitabda çoxsaylı fotoşəkillər də verilmişdir.