Muxtar respublika məktəbliləri ölkə və beynəlxalq səviyyəli idman yarışlarında 49 medal qazanıblar
Naxçıvan, 4 mart, AZƏRTAC
Naxçıvan şəhərində fəaliyyət göstərən Heydər Əliyev Uşaq-Gənclər Yaradıcılıq Mərkəzində ölkə və beynəlxalq səviyyəli idman yarışlarında fərqlənən şagirdlərin və onların müəllimlərinin mükafatlandırılma tədbiri keçirilib.
AZƏRTAC-ın Naxçıvan bürosu xəbər verir ki, tədbirdə Təhsil naziri Rəhman Məmmədov çıxış edərək təhsilin inkişafına göstərilən dövlət qayğısından danışıb. Bildirib ki, Naxçıvan Muxtar Respublikası Ali Məclisi Sədrinin diqqət və qayğısı sayəsində ötən müddətdə 200-dən çox müasirtipli, hər cür maddi-texniki bazaya malik, informasiya-kommunikasiya texnologiyaları ilə təmin olunmuş məktəb binaları tikilib və ya əsaslı şəkildə yenidən qurularaq istifadəyə verilib. Bu məktəblərdə ən müasir tələblərə cavab verən 198 idman zalı və bütün məktəblərdə açıq idman qurğuları, şahmat sinifləri yaradılıb.
Qeyd olunub ki, muxtar respublikanın Təhsil Nazirliyinin tabeliyində fəaliyyət göstərən Uşaq-gənclər şahmat və idman məktəblərinin də infrastrukturu yenilənib, onların fəaliyyəti üçün zəruri şərait yaradılıb. Şahmatın yüksək səviyyədə tədrisini təmin etmək üçün Şahmat Federasiyası tərəfindən “Pillə-pillə” və “Debütdə buraxılmış səhvlərə aid 1000 oyun” kitabları nəşr olunaraq ümumtəhsil məktəblərinə verilib. Muxtar respublikanın təhsil müəssisələrində fəaliyyət göstərən fiziki tərbiyə müəllimlərindən 14-nün əməyi yüksək qiymətləndirilib, onlar fəxri adlarla təltif olunublar. Naxçıvan şəhər 15 nömrəli tam orta məktəbin şagirdi, dünya çempionu Rafiq Hüseynlinin adı gənc istedadların “Qızıl kitabı”na salınaraq xüsusi aylıq təqaüdə layiq görülüb.
Təhsil naziri ümumtəhsil müəssisələrində yaradılan şəraitdən səmərəli istifadə olunmasının diqqətdə saxlanıldığını, şahmat müəllimlərinin sertifikasiyası istiqamətində zəruri tədbirlərin görüldüyünü bildirib. Diqqətə çatdırılıb ki, 487 şahmat müəlliminə Naxçıvan Muxtar Respublikası Şahmat Federasiyası və Təhsil Nazirliyinin sertifikatı verilib, müsabiqələrdə ən yüksək nəticə göstərən 24 fiziki tərbiyə müəllimi işə götürülüb, 68 məzun ali məktəblərin bədən tərbiyəsi və idman ixtisaslarına qəbul olub, fiziki tərbiyə müəllimlərinin ixtisasartırma kursları təşkil edilib.
Çıxışda muxtar respublikamızda idmanın inkişafı istiqamətində yaradılan əlverişli şərait və federasiyaların fəaliyyəti nəticəsində şagirdlər tərəfindən muxtar respublika, eyni zamanda, ölkə və beynəlxalq səviyyəli idman yarışlarında qazanılan yüksək nəticələrdən bəhs edilib.
Təhsil naziri ölkə və beynəlxalq səviyyəli idman yarışlarında fərqlənən şagirdləri və onların məşqçilərini təbrik edib, muxtar respublikada idmanın və təhsilin inkişafına göstərdiyi diqqət və qayğıya görə bütün təhsil işçiləri adından Naxçıvan Muxtar Respublikası Ali Məclisinin Sədrinə dərin minnətdarlığını bildirib.
Naxçıvan Muxtar Respublikasının Gənclər və İdman naziri Azad Cabbarov çıxışında qeyd edib ki, müasir idman tariximizin, uğur və nailiyyətlərimizin əsası Azərbaycan xalqının ümummilli lideri Heydər Əliyevin ölkəyə rəhbərlik etməyə başladığı dövrə təsadüf edir. Məhz Ulu Öndərin hakimiyyəti illərində ölkədə idman infrastrukturu yenidən qurulub, idmançılarımızın beynəlxalq miqyaslı idman yarışlarına hazırlığı və iştirakı təmin edilib. Nəticədə, ölkədə idmanın təbliği və kütləviləşdirilməsi baxımından ciddi uğurlar əldə olunub. Hazırda Prezident İlham Əliyev tərəfindən uğurla davam etdirilən dövlət idman siyasəti hər il öz nəticələrini daha da yaxşılaşdırmaqla, Azərbaycan idmanına daxili inamı və beynəlxalq etimadı anbaan artırmaqdadır.
Vurğulanıb ki, muxtar respublikada da idman və idmançılara dövlət qayğısı ən yüksək səviyyədədir. Göstərilən qayğının və yaradılan hərtərəfli şəraitin nəticəsidir ki, ötən il 49 şagird ölkə və beynəlxalq səviyyəli idman yarışlarında qalib gəlib. 2019-cu ildə muxtar respublika məktəblilərindən 21-i birinci, 9-u ikinci, 19-u üçüncü yer olmaqla, 49-u ölkə və beynəlxalq səviyyəli yarışların qalibi olub.
Sonra Ordubad Rayon Uşaq-Gənclər İdman Məktəbinin direktoru Elşən Əliyev və Şərur Rayon Uşaq-Gənclər İdman Məktəbinin Ağır atletika dərnəyinin üzvü Gülcahan Əliyeva qazandıqları uğurların muxtar respublikada idman sahəsində yaradılan şərait hesabına olduğunu vurğulayıb, bundan sonra da mövcud şəraitdən səmərəli istifadə edərək gələcəkdə daha yüksək nəticələr qazanacaqlarını bildiriblər.
Tədbirdə ölkə və beynəlxalq səviyyəli idman yarışlarında fərqlənən şagirdlərə və onların müəllimlərinə diplom və hədiyyələr təqdim edilib.
Sonra Naxçıvan Dövlət Televiziyası tərəfindən muxtar respublikada idmanın inkişafı ilə bağlı hazırlanmış sənədli film nümayiş etdirilib, Naxçıvan Dövlət Uşaq Teatrının vətənpərvərlik mövzusunda hazırladığı “Unutmamalıyıq” adlı səhnəciyə baxış olub.
Bölmənin digər xəbərləri
