Naxçıvan, 6 mart, AZƏRTAC

Azərbaycan Respublikası və Naxçıvan Muxtar Respublikası Gənclər və İdman nazirlikləri, Naxçıvan Muxtar Respublikasının idman federasiyalarının təşkilatçılığı ilə Naxçıvan şəhərində yerləşən “Saat meydanı” turizm istirahət mərkəzində 5 mart - Bədən Tərbiyəsi və İdman Gününə həsr olunmuş İdman festivalı maraqlı tədbirlərlə yadda qalıb.

AZƏRTAC-ın Naxçıvan bürosunun və muxtar respublikada dərc olunan “Şərq qapısı” qəzetinin əməkdaşları festival iştirak edən ölkəmizin tanınmış idmançılarının, idman mütəxəssislərinin, məşqçi-müəllimlərin və rəsmi şəxslərin fikirlərini öyrəniblər.

Azərbaycan Respublikası Gənclər və İdman Nazirliyinin mətbuat xidmətinin rəhbəri Səmayə Məmmədova qeyd edib ki, 25 il bundan öncə, 1995-ci ildə Bakı İdman Sarayında ümummilli lider Heydər Əliyevin olimpiya, dünya çempionları, idman ictimaiyyəti ilə görüşü olub. Məhz həmin dövrdən başlayaraq Azərbaycanda vahid idman strategiyası müəyyən edilib, idmanın və olimpiya hərəkatının inkişafı üçün dövlət səviyyəsində mühüm tədbirlər həyata keçirilib. Prezidentin 2005-ci ildə imzaladığı müvafiq Sərəncam ilə hər il martın 5-i ölkəmizdə Bədən Tərbiyəsi və İdman Günü kimi qeyd olunur, bununla əlaqədar ölkəmizin hər yerində müxtəlif idman yarışları keçirilir. Artıq İdman festivalının təşkili də ənənə halını alıb. Ulu öndər Heydər Əliyevin 25 il öncə atdığı mütərəqqi addıma həsr olunmuş budəfəki idman bayramının ölkənin idman siyasətinin əsasını qoyan dahi şəxsiyyətin dünyaya göz açdığı Naxçıvanda keçirilməsi heç də təsadüfi deyil.

“Muxtar respublikanın son illərdə beynəlxalq yarışlara ev sahibliyi edən bir məkan kimi də diqqəti çəkməsi seçim prosesində həlledici məqam oldu. Festivalın “Saat meydanı” kimi belə gözəl məkanda və yüksək səviyyədə təşkili Bakıdan buraya üz tutan idman ictimaiyyətini hədsiz dərəcədə sevindirdi”, - deyən Səmayə Məmmədova bildirib ki, bu idman bayramının mühüm xüsusiyyətlərindən biri də ölkənin yüksək titullu idmançılarının, idman ictimaiyyətinin bir araya gələrək gələcəyə, inkişafa yönələn maraqlı dialoqlar qurmasıdır. Bu da, son nəticədə, bu sahədə yüksəlişə xidmət edir.

Azərbaycan Respublikası Gənclər və İdman Nazirliyinin mətbuat xidmətinin rəhbəri deyib: “Biz burada olduğumuz müddətdə muxtar respublikada fəaliyyət göstərən ayrı-ayrı federasiyaların hazırladığı nömrələrə tamaşa etdik, güclü idmançıların məşq prosesini seyr etdikcə, həqiqətən, könlümüz açıldı. Festival çərçivəsində buradakı idman veteranları ilə də görüş oldu ki, bu da idmanımızın dünəninə verilən böyük dəyərdir. Ümumilikdə, onu deyə bilərəm ki, İdman festivalı yüksək səviyyədə, rəngarəng formada keçdi, burada iştirak etməyimə çox şad oldum”.

Ağır atletika üzrə dünya və Avropa çempionu Nizami Paşayev də bu gün çox əlamətdar bir gün olduğunu vurğulayaraq deyib: “Bayramımızı dahilər, sərkərdələr yurdu Naxçıvanda qeyd etməyimiz bizim üçün ikiqat xoş əhval-ruhiyyə yaratdı. Onu da deyim ki, bu mənim Naxçıvana ilk gəlişim deyil, əvvəllər burada bir neçə dəfə təlim-məşq toplanışlarında iştirak etmişəm. Bir idmançının hərtərəfli yetişməsi üçün qədim diyarın əlverişli müsbət xüsusiyyətləri çoxdur. İnsanı daim gümrah saxlayan gözəl havası, təbiəti var, peşəkar formada yetişmək üçün idman infrastrukturu da yüksək səviyyədədir. Sevinirəm ki, bugünkü festival sayəsində naxçıvanlı idmançılarla da bir daha görüşə bildim. Fürsətdən istifadə edib bütün idmançıları, idman ictimaiyyətini əlamətdar gün münasibətilə təbrik edir, onlara yeni-yeni uğurlar arzulayıram”.

Nizami Paşayev vurğulayıb ki, son illər Naxçıvan idmançılarının beynəlxalq arenalarda özlərini yaxşı tərəfdən göstərmələri də aparılan uğurlu idman siyasətinin nəticəsidir. Burada ağır atletika üzrə artıq yeniyetmələr arasında olimpiya mükafatçısının, Avropa birinciliyinin qalibinin olmasını nümunə kimi göstərmək olar.

Olimpiya çempionu Fərid Mansurov vurğulayıb ki, ənənə halını alan İdman festivalı ölkəmizin qədim diyarı olan Naxçıvanda təqdirəlayiq şəkildə təşkil olundu. Festivalda Azərbaycanın tanınmış idmançıları, məşqçilər, olimpiya, dünya çempionları və idman veteranları iştirak etdilər. Naxçıvandakı İdman festivalı əsl bayram əhval-ruhiyyəsi ilə keçdi. Ayrı-ayrı federasiyaların yetirmələrinin nümayiş etdirdikləri nömrələrə baxdıq, ardınca da gözəl konsert proqramı oldu. Ümumilikdə, festival bənzərsiz çalarları ilə yadda qaldı. Belə tədbirlərin keçirilməsi yeniyetmə və gənclərimizin idmana olan həvəsini daha da artıracaq.

Veteran futbolçu, məşqçi Ağasəlim Mircavadov deyib: “Bu gün idman sahəsində fərqlənən, uğurlara imza atan və əldə olunan qələbələrə sevinən hər bir azərbaycanlının, ən əsası milli idmanımızın bayramıdır. Mən çox şadam ki, Naxçıvanda təşkil olunan möhtəşəm İdman festivalında iştirak etdim. Əsası Ümummilli Lider tərəfindən qoyulan idman siyasətinin bu gün muxtar respublikada da uğurla davam etdirildiyinin şahidiyik. Burada idmana böyük diqqət və qayğı var. Mən Naxçıvana idman tədbirləri üçün tez-tez gəlirəm. Əminliklə qeyd edə bilərəm ki, hər il idman sahəsi daha da inkişaf edir, yeni-yeni nailiyyətlər əldə olunur. Yetirmələrimdən olan Əsgər Abdullayevin adını çəkmək istəyirəm. Bildiyiniz kimi, futbolda əsas iş məşqçinin üzərinə düşür. Əsgər Abdullayev Naxçıvanda yeni inkişaf etməkdə olan futbolun kütləviliyinə xidmət edir”.

Ağasəlim Mircavadov əmin olduğunu bildirib ki, muxtar respublika futbolçuları onlara göstərilən bu etimadı doğruldacaq və dünya səviyyəli peşəkar futbolçu kimi yetişəcəklər. Möhtəşəm İdman festivalı da bunun əyani göstəricisidir.

Veteran voleybolçu, Azərbaycan Voleybol Federasiyasının mətbuat xidmətinin rəhbəri Şəfəq Kərimova qədim diyarda keçirilən İdman festivalında iştirak etməsindən məmnuniyyətini ifadə edərək deyib: “Biz əvvəlcə Heydər Əliyev Muzeyində olduq. Orada dahi siyasətçinin keçdiyi ömür yoluna bir daha nəzər saldıq. Bildiyiniz kimi, bu günün qeyd olunması Ulu Öndərin adı ilə bağlıdır. Azərbaycanda ənənə halını alan idman festivalı hər il möhtəşəm keçirilir. Naxçıvandakı festival da çox yüksək səviyyədə təşkil olunub. Tədbirin iştirakçıları da əsl bayram əhvalı ilə öz hünərlərini göstərirlər. Festivalın təşkilində əməyi olanlara minnətdarlığımı bildirirəm”.

Belə bir möhtəşəm tədbirdə iştirak etməkdən qürur duyduğunu bildirən taekvondo üzrə dünya çempionu, taekvondo üzrə yığma komandanın böyük məşqçisi Rəşad Əhmədov vurğulayıb ki, İdman festivalında Azərbaycan idmanını beynəlxalq arenalarda layiqincə təmsil edən idmançılar iştirak ediblər. Hər biri öz idman növündə, demək olar ki, ölkənin ən istedadlısıdır: “Festivalın Naxçıvanda keçirilməsi həm də əlamətdar bir hadisədir. Çünki bir çox idmançımız məhz burada idmanın sirlərini öyrənib. Muxtar respublikada ilk dəfə təşkil olunan festival öz gözəlliyi, cəlbediciliyi ilə bütün idmançıların yaddaşında dərin iz buraxacaq”.

O, keçmiş idmançı kimi öz peşəsini sevən, bu sahədə Azərbaycanın bayrağını dünya arenalarında dalğalandıran bütün idmançıları, məşqçiləri, idman ictimaiyyətini bayram münasibətilə təbrik edib.