Müzəffər Ali Baş Komandan İlham Əliyev müasir dünya və Azərbaycan tarixinin böyük sərkərdəsidir
Bakı, 26 iyun, AZƏRTAC
Azərbaycan Respublikası Silahlı Qüvvələrinin şərəfli tarixi müstəqil Azərbaycan dövlətini quraraq onun gələcək dövrlərdə də müstəqil və çiçəklənən gələcəyini təmin edən, Azərbaycan xalqı üçün gördüyü əvəzsiz işlərlə, yerinə yetirdiyi tarixi missiya ilə haqlı olaraq xalqımızıın ümummilli lideri statusunu məhz xalq tərəfindən qazanan Heydər Əliyevin adı ilə bağlıdır. Əgər bu gün Azərbaycan Ordusu qalib ordu statusuna yiyələnibsə, bu nailiyyət ümummilli lider Heydər Əliyev siyasi xəttinin, güclü dövlət quruculuğu strategiyasının Prezident İlham Əliyev tərəfindən dəqiqliklə və yüksək peşəkarlıqla yürüdülməsinin nəticəsidir.
Bunu AZƏRTAC-a açıqlamasında politoloq Şəbnəm Həsənova deyib.
Politoloq bildirib ki, Azərbaycan xalqının ümummilli lideri Heydər Əliyevin hələ sovet dövründə xüsusi diqqət göstərdiyi məsələlərdən biri də SSRİ Silahlı Qüvvələri tərkibində azərbaycanlı zabitlərin məsul vəzifələrə irəli çəkilməsi idi. Ulu Öndər bu məqsədlə azərbaycanlı zabitlərin sovet qoşunlarında tutduqları vəzifələri, keçdikləri karyera yolunu mütəmadi olaraq diqqətlə izləyir və əlindən gələn hər şeyi edirdi ki, yüksək vəzifəli zabitlər arasında azərbaycanlılar da olsun. Bu səbəbdən də, bir sıra zabitlərin və generalların daha yüksək vəzifələrə təyin olunması işinə məhz Heydər Əliyev dəstək və nail olmuşdur. Bu isə heç şübhəsiz ki, uzunmüddətli hərbi hədəflərə istiqamətlənmiş bir məsələ idi. Belə ki, azərbaycanlı zabit və generalların məsul vəzifələrə gətirilməsi ilə Azərbaycanın bugünkü zabit kadrlarının əsası hələ o dönəmdən qoyulmağa başlayıb.
2016-cı il Aprel döyüşləri isə Qələbəmizə gedən uğurlu, nurlu yolun başlanğıcı oldu. Aprel döyüşləri şanlı Ordumuzun gücünü, xalqımızın Vətən sevgisini, torpaq həsrəti ilə yaşadığını düşmənə zərrə qədər olsa belə Vətən torpağından pay verməyəcəyini dünyaya sübut etdi.
Dünyanın siyasi proseslərini qabaqlamağı bacaran ümummilli lider Heydər Əliyev hər zaman bildirirdi: “İqtisadiyyatı güclü olan dövlət hər şeyə qadirdir”. Prezident İlham Əliyev isə hər zaman qeyd edirdi ki, dünyada beynəlxalq hüququn deyil, gücün işlədiyinin şahidiyik, məhz buna görə də biz iqtisadiyyatımızı gücləndirməliyik. Məhz bu uzaqgörən siyasətin nəticəsidir ki, güclü iqtisadiyyata malik olan Azərbaycanın Ordusu müasir silah-sursatla təchiz olundu. Dövlət büdcəsindən müdafiə xərclərinə böyük vəsaitin ayrılması ilə hərbi üstünlüyümüzün daha da yüksəlməsini təmin etdik, ölkənin müdafiə sənayesi yaradıldı, ölkəmizin hərbi sahədə əməkdaşlıq əlaqələri genişləndirildi və nəticədə Azərbaycan Ordusu dünyanın ən güclü 50 ordusu sırasına daxil oldu.
Vətən müharibəsində əldə olunan Qələbənin açarı Azərbaycan dövlətinin başında İlham Əliyev kimi bir liderin dayanması idi. Əgər 44 günlük Vətən müharibəsində Azərbaycan Ordusu bütün dünyaya iqtisadi gücünü, güclü ordusunu nümayiş etdirdisə, eyni zamanda, xalqımız milli həmrəylik göstərdi, Müzəffər Ali Baş Komandanın ətrafında bir yumruq kimi birləşərək əsgər və zabitlərimizə dəstək oldu. Hər bir qarış torpağın işğaldan azad olunması ən ucqar kəndlərimizdə belə bayram əhval-ruhiyyəsi yaradır, ürəyi Vətən eşqi ilə döyünən hər bir Azərbaycan gənci cəbhəyə yollanmaq üçün gün sayırdı. Məhz bu milli ruh bizi Qələbəyə aparan amil oldu. Eyni zamanda, dövlətimizin başçısı gecəsini gündüzünə qataraq, fəaliyyətini bu Qələbəyə kökləyərək bütün resursları vahid amal uğrunda səfərbər etdi. Davamlı olaraq siyasi, sosial-iqtisadi qüdrətin artırılması mövqelərimizi möhkəmləndirdi.
“Biz müharibəni əhəmiyyətsiz danışıqlarla yox, şəhidlərimizin canı, qanı bahasına, hərbçilərimizin şücaəti hesabına qazanmışıq" deyən Prezident İlham Əliyev hər bir hərbçinin fəaliyyətini hər zaman yüksək dəyərləndirir. Şəhid ailələrinə, müharibə əlillərinə, veteranlara, hərbi qulluqçulara diqqət və qayğı dövlətimizin başçısının siyasətinin əsas istiqamətlərindən birini təşkil edir. 2021-ci il iyunun 24-də Silahlı Qüvvələrin Ali Baş Komandanı İlham Əliyev bir qrup hərbi qulluqçunu “Suqovuşanın, Laçının, Kəlbəcərin, Ağdamın, Şuşanın, Qubadlının, Cəbrayılın, Xocavəndin, Zəngilanın, Füzulinin azad olunmasına görə” medalı ilə təltif etdi. Eyni zamanda, “İşğaldan azad olunmuş ərazilərdə Azərbaycan Respublikası Müdafiə Nazirliyinin həqiqi hərbi xidmət edən hərbi qulluqçularının aylıq vəzifə maaşlarına Azərbaycan Respublikası Prezidentinin əlavəsinin müəyyən edilməsi haqqında” Azərbaycan Respublikası Prezidentinin Sərəncamı Ali Baş Komandanın rəhbərliyi ilə dövlətin hərbçilərə diqqət və qayğısının növbəti əyani təzahürüdür. Belə ki, Sərəncama uyğun olaraq Prezidentin əlavəsi hərbi qulluqçuların aylıq vəzifə maaşlarının 20-60 faizi həcmində olacaq. Bu sərəncamların hər biri cəmiyyət tərəfindən də olduqca müsbət qarşılanıb. Hərbi qulluqçularımıza, şəhid ailələrinə, müharibə əlillərinə, veteranlara, qazilərə göstərilən bu diqqət və qayğı xalqımızı daha da həmrəy edir və hər keçən gün Müzəffər Ali Baş Komandan İlham Əliyevin ətrafında daha sıx dayanmağımızın olduqca haqlı və əsaslı olduğunu sübut edir. Tarixi missiya şərəflə yerinə yetirildi və ərazi bütövlüyümüz təmin olundu. Milli maraqlarımızı hər zaman hər şeydən üstün tutan, millətimizin qürurlu xalq olduğunu bütün dünyada sübuta yetirən, Azərbaycan Ordusunu ən ali diqqətdə saxlayan Müzəffər Ali Baş Komandan İlham Əliyev müasir dünya və Azərbaycan tarixinin böyük sərkərdəsidir.
Azərbaycan kimi mürəkkəb bir coğrafi şəraitdə yerləşən ölkənin təhlükəsizliyini, müdafiəsini və ərazi bütövlüyünü qorumaq işini öz üzərinə götürən və vəzifələrinin öhdəsindən olduqca yüksək səviyyədə, şərəflə gələn Azərbaycan Silahlı Qüvvələri Müzəffər Ali Baş Komandan İlham Əliyevin rəhbərliyi ilə hər zaman Vətənin keşiyində möhkəm dayanır. Bu gün hər bir Azərbaycan vətəndaşı əmindir ki, o, ərazi bütövlüyü təmin olunmuş, təhlükəsiz bir ölkədə yaşayır. Eşq olsun hərbçilərimizə! Yaşasın Müzəffər Ali Baş Komandanın qalib Ordusu!
Bölmənin digər xəbərləri
