Muzeydə Şəhidlərin xatirəsi anılıb
Bakı, 19 yanvar, Zərəngiz Mansurova, AZƏRTAC
Yanvarın 19-da Üzeyir Hacıbəylinin ev-muzeyində 20 Yanvar şəhidlərinin xatirəsinə həsr edilmiş tədbir keçirilib.
AZƏRTAC xəbər verir ki, əvvəlcə şəhidlərin xatirəsi bir dəqiqəlik sükutla yad edilib. Muzeyin direktoru, Əməkdar İncəsənət Xadimi Sərdar Fərəcov 26 il əvvəl Azərbaycanın müstəqilliyi uğrunda canlarından keçmiş şəhidlərin xatirəsinin hər zaman əziz tutulduğunu bildirib.
Tədbirdə C.Məmmədquluzadənin ev-muzeyinin direktoru, Əməkdar Mədəniyyət İşçisi Pərixanım Mahmudova 1990-cı il yanvarın 19-dan 20-nə keçən gecə dinc və günahsız sakinlərin qətlə yetirilməsindən, Azərbaycanın müstəqilliyi və azadlığı uğrunda həlak olanların qəhrəmanlığından söz açıb.
Digər çıxış edənlər 20 Yanvarın xalqımızın qan yaddaşına yazılan qəhrəmanlıq salnaməsi, eyni zamanda, Azərbaycanın istiqlal yolunun ilk zirvəsi, milli məfkurənin oyanış günü olduğunu vurğulayıblar.
Tədbir Nizami rayonunun mədəniyyət mərkəzi işçilərinin və rayonun 18 nömrəli orta məktəbinin şagirdlərinin ifasında ədəbi-bədii kompozisiya ilə yekunlaşıb.
Bölmənin digər xəbərləri
