Myanmada toqquşmalar nəticəsində ölənlərin sayı 450 nəfəri ötüb
Bakı, 29 mart, AZƏRTAC
Fevralın 1-dən bəri Myanmada güc strukturlarının əməkdaşları və etirazçılar arasında baş verən toqquşmalar nəticəsində həlak olanların sayı 459 nəfərə çatıb.
AZƏRTAC xəbər verir ki, bu barədə məlumatı Myanmada Siyasi Məhbuslara Yardım Assosiasiyası özünün “Twitter” səhifəsində yayıb.
Həmçinin fevralın 1-dən indiyədək ölkədə 2 min 559 nəfərin saxlanıldığı, 119 nəfərin isə həbsinə order verildiyi bildirilir. “The Irrawaddy” nəşrinin məlumatına əsasən, martın 27-də Myanmanın müxtəlif şəhərlərində etiraz aksiyalarının dağıdılması zamanı azı 102 nəfər öldürülüb.
Xatırladaq ki, fevralın 1-də Myanmada baş verən hərbi çevriliş nəticəsində hakimiyyət silahlı qüvvələrin nəzarətinə keçib. Hərbçilər bir il müddətinə ölkədə fövqəladə vəziyyət rejimi elan edib və yeni nazirlər kabineti formalaşdırıb. 2020-ci ilin noyabrında keçirilən seçkiləri saxtalaşdırmaqda ittiham edilən Prezident Vin Min və digər yüksək vəzifəli məmurlar həbs olunub. Respublika əhalisi fevralın əvvəlindən başlayaraq hərbi çevrilişə qarşı aksiyalar keçirir, təhlükəsizlik qüvvələri isə etirazların qarşısını almağa çalışır.
Bölmənin digər xəbərləri
