NARKOTİK VASİTƏLƏRİN QANUNSUZ DÖVRİYYƏSİNƏ QARŞI MÜBARİZƏ DAVAM EDİR
AZƏRTAC xəbər verir ki, iyunun 26-da Beynəlxalq Mətbuat Mərkəzində Narkomanlığa və Narkotik Vasitələrin Qanunsuz Dövriyyəsinə qarşı Mübarizə üzrə Dövlət Komissiyasının işçi qrupu 26 iyun - BMT-nin Narkotiklərlə Mübarizə günü ilə bağlı mətbuat konfransı keçirmişdir.
İşçi qrupunun rəhbəri, tibb elmləri doktoru Araz Əliquliyev bildirmişdir ki, hər il Azərbaycanda Narkotiklərlə Mübarizə günü ilə əlaqədar Narkomanlığa və Narkotik Vasitələrin Qanunsuz Dövriyyəsinə qarşı Mübarizə üzrə Dövlət Komissiyası, əlaqədar nazirlik, komitə və təşkilatlarla birgə məhkəmə hökmləri ilə müsadirə edilmiş narkotik vasitələrin, psixotrop maddələrin və onların prekursorlarının məhv edilməsini həyata keçirir. 2007-ci il ərzində hüquq mühafizə orqanlarının qarşılıqlı səyləri nəticəsində narkotik vasitələrin, psixotrop maddələrin və onların prekursorlarının ölkə ərazisinə qaçaqmalçılıq yolu ilə gətirilməsinin, yayılmasının qarşısını almaq məqəsdi ilə keçirdikləri profilaktik və əməliyyat-axtarış tədbirləri nəticəsində 2376 cinayət faktı aşkar edilmiş, onlardan 860-ı satış, 1386-sı saxlama, 108-i isə narkoxassəli bitkilərin əkilib becərilməsi olmuşdur. Bu müddətdə narkotiklərlə bağlı 2141 şəxs tutularaq cinayət məsuliyyətinə cəlb edilmişdir. Qanunsuz dövriyyədən 1 ton 150 kiloqramdan çox müxtəlif növ narkotik vasitələr və psixotrop maddə çıxarılmışdır. Yabanı bitmiş və qanunsuz əkilib-becərilmiş 359 tondan artıq narkoxassəli bitkilər aşkar olunaraq məhv edilmişdir.
Ötən il həkimin təyinatı olmadan narkotik vasitələrdən istifadə etdikləri üçün 32 nəfərin dünyasını dəyişdiyini deyən Araz Əliquliyev məlumat vermişdir ki, 2007-ci ildə qanunsuz dövriyyədən çıxarılmış 676 kiloqram 575 qram müxtəlif növ narkotik vasitələr yandırılaraq məhv edilmişdir. Bu da 2006-cı illə müqayisədə 33 faiz, yəni 170 kiloqramdan çoxdur.
Araz Əliquliyev bildirmişdir ki, ötən il Azərbaycan Prezidentinin 2007-ci il 28 iyun tarixli Sərəncamı ilə təsdiq edilmiş “Narkotik vasitələrin, psixotrop maddələrin və onların prekursorlarının qanunsuz dövriyyəsi və narkomanlığın yayılması ilə mübarizə üzrə Proqram (2007-2012-ci illər)” dönmədən yerinə yetirilmiş, əlaqədar qurumların nümayəndələri ilə birgə respublikanın 50-dən çox şəhər və rayonunda “Sağlam həyat tərzi, gənclər narkotiklərə yox deyir” və s. mövzularda seminar müşavirələr keçirilmişdir.
Diqqətə çatdırılmışdır ki, Dövlət Komissiyası narkomanlığın yayılmasının, narkotik vasitələrin qanunsuz dövriyyəsinə qarşı aparılan mübarizə işinin səmərəliliyinin artırılması üçün müvafiq qurumlarla yanaşı, qeyri-hökumət və beynəlxalq təşkilatlar da öz səylərini birləşdirir.
Xüsusi vurğulanmışdır ki, Azərbaycan Prezidenti İlham Əliyevin müvafiq sərəncamı ilə prezident yanında qeyri-hökumət təşkilatlarına Dövlət Dəstəyi Şurası yaradılmışdır. Şuranın maliyyə xərclərinin müvafiq bəndində narkomanlıq probleminin həlli üçün 90 min manat vəsait ayrılmışdır. Bu, problemin həlli istiqamətində qeyri-hökumət qurumlarının və beynəlxalq təşkilatların Dövlət Komissiyası ilə birgə işgüzar fəaliyyətlərinə bariz nümunədir.
Daxili İşlər Nazirliyinin, Dövlət Gömrük Komitəsinin, Baş Prokurorluğun və s. nümayəndələri narkomaniyanın törətdiyi fəsadlardan, narkotik vasitələrin qanunsuz dövriyyəsinə qarşı aparılan əlbir mübarizənin zəruriliyi barədə danışmışlar.
