NATO-nun Atlantik Müqaviləsi Assosiasiyasının tədbirində Azərbaycanın uğurlarından danışılıb
Bakı, 13 may, AZƏRTAC
Mayın 12-də Azərbaycanın xarici işlər naziri Elmar Məmmədyarov Türkiyənin Antalya şəhərində NATO-ya üzv dövlətlərin xarici işlər nazirlərinin iclası ərəfəsində NATO-nun əsas beyin mərkəzi sayılan Atlantik Müqaviləsi Assosiasiyası (ATA) tərəfindən təşkil olunan “Gənclərin nazirlər iclası”nda çıxış edib.
Nazirliyin mətbuat xidmətindən AZƏRTAC-a bildiriblər ki, nazir Elmar Məmmədyarov çıxışında NATO-nun Əfqanıstanda həyata keçirdiyi missiyaya Azərbaycanın verdiyi töhfələr və iki ölkə arasında münasibətlər barədə danışıb. O, Azərbaycanın ISAF əməliyyatında sonadək əzmlə iştirak etdiyini və bunun 2015-ci ilin yanvar ayından başlayan Qətiyyətli Dəstək missiyası kontekstində də davam etdirdiyini vurğulayıb.
Elmar Məmmədyarov Azərbaycanın müstəqilliyini bərpa etdikdən sonra üzləşdiyi bir çox problemlər barədə danışıb, xüsusilə Ermənistanın Azərbaycana təcavüzü nəticəsində ərazilərimizin 20 faizinin işğal olunduğunu, bir milyondan çox soydaşımızın qaçqın və məcburi köçkün vəziyyətinə düşdüyünü qeyd edib. O, BMT Təhlükəsizlik Şurasının münaqişə ilə əlaqədar qəbul etdiyi qətnamələrin ikili standartlara əsaslanan yanaşma nəticəsində hələ də icra edilmədiyini vurğulayıb.
Nazir bütün çətinliklərə, təcavüz və işğal faktına baxmayaraq, son on il ərzində ölkəmizdə yoxsulluq səviyyəsinin 49 faizdən 4 faizə qədər azaldığını, ümumi daxili məhsulun 3,5 dəfə artdığını və Azərbaycanın regionun aparıcı dövlətinə çevrildiyini bildirib. O, bütün bunların düzgün siyasi-iqtisadi strategiya və resurslardan səmərəli istifadə nəticəsində mümkün olduğunu diqqətə çatdırıb.
Elmar Məmmədyarov, həmçinin Azərbaycanın təlim, təhsil, iqtisadiyyat və fövqəladə hallarda yardıma dair məsələlər üzrə Əfqanıstana dəstək göstərdiyini vurğulayıb. O, ordu quruculuğu, ADA Universitetinin xətti ilə keçirilən kurslar, ANAMA-nın əfqan mütəxəssislər üçün təşkil etdiyi minalardan təmizləmə üzrə təlim proqramları, o cümlədən yerli əhali arasında mina təhlükəsizliyi üzrə dərsliklərin nəşr etdirilməsi barədə məlumat verib. Bu kimi yardımların davamlı xarakter daşıdığını deyən Elmar Məmmədyarov əfqan mütəxəssislərin Azərbaycan Respublikası Fövqəladə Hallar Nazirliyinin Akademiyasında ödənişsiz təhsil almaları məsələsinin də nəzərdən keçirildiyini qeyd edib.
Nazir çıxışında regional inkişafın təhlükəsizlik, sabitlik və davamlılıq kimi üç əsas meyarının olduğunu da vurğulayıb.
Elmar Məmmədyarov tədbir iştirakçılarının Azərbaycanın enerji siyasəti, TANAP və TAP layihələri, geostrateji əhəmiyyəti və regiondakı rolu barədə suallarını cavablandırıb.
Bölmənin digər xəbərləri
