NATO-NUN ZİRVƏ GÖRÜŞÜNÜN İKİNCİ İŞ GÜNÜ
İraq barədə bəyannamədə deyilir ki, biz, NATO-nun üzvü olan 26 ölkənin dövlət və hökumət başçıları İraq Respublikasının müstəqilliyini, suverenliyini, birliyini, ərazi bütövlüyünü və bu ölkədə azadlığın, demokratiyanın, insan hüquqlarının, qanunun aliliyinin və bütün İraq xalqının təhlükəsizliyinin möhkəmləndirilməsini tam dəstəkləyirik. Ölkədə daxili təhlükəsizliyi təmin etməyə çalışan və 2005-ci ildə milli seçkilər keçirməyə hazırlaşan yeni suveren müvəqqəti hökumətə tam əməkdaşlıq təklif edirik. İraqdakı terror aktlarını pisləyir və onlara dərhal son qoyulmasına çağırırıq. İraqın daxilindəki və İraqdan qaynaqlanan terrorçuluq fəaliyyəti İraqın qonşuları və bütün bölgənin əmin-amanlığı üçün təhlükə yaradır.
Sənəddə İraqda Birləşmiş Millətlər Təşkilatının mövcudluğu saxlanmaqla terrorizmə qarşı mübarizədə, daxili sabitliyin, təhlükəsizliyin təmin olunmasında NATO-nun imkanlarından geniş istifadə edilməsi də vurğulanır.
Lakin İraqla bağlı qərarın qəbul edilməsi birmənalı olmamış, Fransa və Almaniya bu məsələdə bir qədər fərqli mövqe tutmuşlar.
“Yeni dövrdə təhlükəsizliyimiz” adlı digər sənəddə vurğulanır ki,
Şimali Atlantika İttifaqına üzv ölkələrin dövlət və hökumət başçıları kollektiv müdafiəyə sadiqliyi yenidən təsdiq etmək və XXI əsrin əvvəlində qarşıya çıxan təhlükəsizlik problemlərinə NATO-nun reaksiyasını ortaya qoya bilmək məqsədi ilə İstanbulda toplaşmışlar. Hazırkı vəziyyətdə Şimali Amerika və Avropa terrorizm təhlükəsi ilə üzləşmişdir və buna görə də NATO-nun qarşısında yeni vəzifələr durur.
Sənəddə deyilir ki, NATO Avropa Birliyi ilə yanaşı, Rusiya, Ukrayna, Orta Asiya və Qafqaz dövlətləri də daxil olmaqla, Avropa dövlətləri və ayrıca Aralıq dənizi və genişləndirilmiş Yaxın Şərq dövlətləri ilə birgə təhlükəsizlik qayğıları çərçivəsində əməkdaşlığın inkişafını davam etdirməkdədir. XXI əsrin problemləri ilə mübarizədə güclü əməkdaşlıq məqsədi ilə bu əlaqələri daha da möhkəmləndirməyi nəzərdə tutan qərarlar qəbul olunmuşdur.
NATO-nun baş katibi Yaap de Hoop Sxeffer toplantının birinci iş gününün sonunda keçirdiyi brifinqdə demişdir: Biz bu zirvə görüşünün mədəniyyətlərin qovuşduğu İstanbul şəhərində keçirilməsini qərara alarkən, genişləndirilmiş NATO-nun qarşısında duran vəzifələrin yerinə yetirilməsi üçün mühüm qərarlar qəbul ediləcəyinə inanırdıq. İnamla deyə bilərik ki, zirvə görüşü ümidləri doğrultdu. NATO-nun fəal üzvü kimi, Türkiyənin bölgədə və dünyada təhlükəsizlik tədbirlərində yeri və rolu artmaqdadır.
İyunun 29-da İstanbul zirvə görüşü öz işini davam etdirdi. Toplantı çərçivəsində Avratlantik Tərəfdaşlığı Şurasının dövlət və hökumət başçıları səviyyəsində görüşü keçirildi. Azərbaycan Prezidenti İlham Əliyev görüşdə iştirak edirdi. İştirakçılar əvvəlcə xatirə şəkli çəkdirdilər.
Görüşü açan NATO-nun baş katibi Yaap de Hoop Sxeffer dövlət və hökumət başçılarını salamlayaraq, “Sülh naminə tərəfdaşlıq” proqramının on illiyinin tamam olduğunu xatırlatdı, bu proqram çərçivəsində səmərəli əməkdaşlığa görə tərəfdaş dövlətlərə təşəkkür etdi. O, ümidvar olduğunu bildirdi ki, əməkdaşlıq gələcəkdə də davam etdiriləcəkdir.
Azərbaycan Prezidenti İlham Əliyev görüşdə çıxış etdi.
X X X
(Dövlətimizin başçısının çıxışı qəzetin bugünkü nömrəsinin birinci səhifəsində dərc olunur).
Avratlantik Tərəfdaşlıq Şurası çərçivəsində 46 üzv və tərəfdaş ölkələrin dövlət və hökumət başçılarının iştirakı ilə keçirilmiş zirvə toplantısının yekunu olaraq dörd sənəd qəbul edildi: Avratlantik Tərəfdaşlığının yenidən istiqamətləndirilməsi və yönəldilməsi; Müdafiə təsisatlarının yaradılmasına dair tərəfdaşlıq əməliyyat planı; İnsan alverinin qarşısının alınması haqqında; Terrorizmə qarşı tərəfdaşlıq planının həyata keçirilməsinə dair hesabat.
Tərəfdaşlığın yenidən istiqamətləndirilməsi sənədində Cənubi Qafqaz və Mərkəzi Asiyadan olan tərəfdaşlarla daha sıx əlaqələr qurulması, habelə həmin regionlarda NATO-nun xüsusi nümayəndəliyinin açılması, habelə digər yeni tərəfdaşlıq mexanizmlərinin yaradılması nəzərdə tutulur.
NATO-nun zirvə görüşündə birgə rəsmi məlumat da qəbul edilmişdir. Burada Cənubi Qafqaz və Mərkəzi Asiya regionları NATO-nun gündəliyində olan strateji regionlar kimi göstərilir, qiymətləndirilir. “Fərdi tərəfdaşlıq fəaliyyəti” planına qoşulan tərəfdaş dövlətlər sırasında Azərbaycan, Gürcüstan və Özbəkistanın adı xüsusi vurğulanır.
Daha bir mühüm məqam odur ki, Avratlantik məkanında yerləşən bütün dövlətlərin suverenliyi, müstəqilliyi və ərazi bütövlüyü NATO tərəfindən dəstəklənir.
Bölmənin digər xəbərləri
