Naxçıvan Dövlət Universitetinin ilk rektoru Əli Əliyevin 120 illiyi qeyd olunub
Naxçıvan, 23 oktyabr, AZƏRTAC
Naxçıvan Dövlət Universitetində Ümummilli Lider Heydər Əliyevin müəllimi, Naxçıvan Dövlət Universitetinin ilk rektoru Əli Əliyevin 120 illiyi qeyd olunub.
NDU-nun Media və ictimaiyyətlə əlaqələr bölməsindən AZƏRTAC-ın Naxçıvan bürosuna bildirilib ki, tədbir iştirakçıları əvvəlcə Naxçıvan şəhər qəbiristanlığında tarix elmləri namizədi, dosent Əli Əliyevin məzarını ziyarət edərək, əklil qoyublar.
Sonra Naxçıvan Dövlət Universitetində görkəmli ictimai-siyasi xadim Əli Əliyevin adına auditoriyanın açılışı olub. Auditoriya Əli Əliyevin zəngin və çoxşaxəli həyat fəaliyyətini əks etdirən şəkillər, elektron resurslar, kitablar və digər elmi-ədəbi mənbələrlə təchiz olunub. Eyni zamanda, burada onun həyat yolu və ictimai fəaliyyətinə dair xüsusi bölmə də təşkil edilib.
Tədbirdə əvvəlcə Əli Əliyevə həsr edilən Naxçıvan Televiziyasının hazırladığı film nümayiş olunub.
Ali təhsil ocağının rektoru Elbrus İsayev görkəmli elm xadimi Əli Əliyevin istər tarix elminin, istərsə də Naxçıvan Dövlət Universitetinin inkişafı sahəsində gördüyü işlərdən ətraflı bəhs edib.
Diqqətə çatdırılıb ki, tarixçi Əli Əliyev Azərbaycan xalqının Ümummilli Lideri, görkəmli dövlət xadimi Heydər Əliyevin müəllimlərindən olub. Rektor Əli Əliyevin elm və təhsil sahəsindəki xidmətlərindən bəhs edərək, böyük ictimai-siyasi xadim kimi fəaliyyətinə toxunub, həmçinin onun Azərbaycan ədəbiyyatında memuar janrında iz qoyduğunu diqqətə çatdırıb.
Bildirilib ki, Azərbaycan-Ermənistan münaqişəsindən bəhs edən əsərlər qələmə alan tarixçinin yazdığı “Əlincə yaddaşı” əsəri Naxçıvanın tarixi və mədəni irsini qoruyan önəmli mənbələrdən biridir. Elbrus İsayev Əli Əliyevin universitetin ilk rektoru kimi Naxçıvanın təhsil mühitinə böyük töhfələr verdiyini və onun xidmətlərinin daim yüksək qiymətləndirildiyini vurğulayıb.
Azərbaycan Milli Elmlər Akademiyası Naxçıvan bölməsinin sədri, akademik İsmayıl Hacıyev qeyd edib ki, Əli Əliyev təhsil sahəsindəki xidmətləri ilə yanaşı, siyasi fəaliyyəti ilə də yaddaşlarda iz buraxıb. Akademik Əli Əliyevin 1941-1947-ci illərdə Naxçıvan MSSR-in Xalq Maarif komissarı, Naxçıvan MSSR-in Maarif naziri, 1951-1967-ci illərdə Naxçıvan MSSR Ali Soveti Rəyasət Heyətinin katibi vəzifələrində çalışdığını, 1967-1970-ci illərdə Azərbaycan Dövlət Pedaqoji İnstitutunun Naxçıvan filialının (indiki Naxçıvan Dövlət Universiteti) təşkilatçısı və ilk direktoru olduğunu vurğulayıb.
AMEA-nın müxbir üzvü, tarix elmləri doktoru, professor Fəxrəddin Səfərli bildirib ki, Azərbaycan Pedaqoji İnstitutunun Naxçıvan filialının və bütövlükdə Naxçıvan təhsil sisteminin formalaşması Əli Əliyevin adı ilə sıx bağlıdır. Əli Əliyevin universitetdə maddi-texniki bazanın yaradılması, kitabxananın təşkili, tələbə elmi cəmiyyətinin formalaşması və elm xadimlərinin yetişdirilməsi istiqamətində əvəzsiz rolu olub.
Tarix elmləri doktoru, dosent Eynulla Mədətli, fəlsəfə elmləri doktoru, professor Məmməd Rzayev, tarix elmləri doktoru, dosent Xəzər Hüseynov, “Xan Sarayı” Dövlət Tarix-Memarlıq Muzeyinin direktoru Nəzakət Əsədova, Əli Əliyevin nəvəsi, tarix üzrə fəlsəfə doktoru Nail Əliyev ali təhsil ocağının ilk rektorunun elmi-pedaqoji və ictimai fəaliyyətindən danışıb, xatirələrini bölüşüblər.
Çıxış edənlər Əli Əliyevin milli dəyərlərə sadiqliyini, çətin dövrlərdə təhsil ocaqlarının inkişafı üçün göstərdiyi fədakarlığı və gənclərə qayğısını vurğulayıblar.
Bölmənin digər xəbərləri
