Naxçıvan, 19 noyabr, Rauf Əliyev, AZƏRTAC

Azərbaycan Respublikası bütün sahələrdə sürətlə inkişaf edir. Aparılan məqsədyönlü siyasət nəticəsində ölkəmizin beynəlxalq aləmdə nüfuzu xeyli yüksəlib, iqtisadi gücü artıb, respublikamız Cənubi Qafqazın ən güclü ordusuna sahib olub. Bu gün Azərbaycan Silahlı Qüvvələri düşmənin istənilən təxribatına çevik şəkildə cavab verir, öz üstünlüyünü sübut edir. Bu mənada Naxçıvan Muxtar Respublikasında da hərbi təhlükəsizlik sistemi lazımi səviyyədə təmin olunub. Muxtar respublikada müasir dünya orduları səviyyəsində yaradılan Əlahiddə Ümumqoşun Ordusu əməliyyat-taktiki baxımdan yüksək döyüş hazırlığına malikdir və ordumuz strateji yüksəkliklərdə etibarlı müdafiə sistemi qurub.

Əvvəlcə strateji yüksəkliklərin əhəmiyyəti barədə onu qeyd etmək yerinə düşər ki, dünyanın istənilən məkanında yüksəkliklərə nəzarət edən ordu düşməndən üstün hesab edilir. Çünki onun ətrafdakı ərazilərə maneəsiz nəzarət imkanı istənilən hədəfi dəqiqliklə yox etməyə şərait yaradır. Təsadüfi deyil ki, bu gün bütün hərbi ekspertlər qədim diyarımızın strateji yüksəkliklərində qərarlaşan Naxçıvandakı Əlahiddə Ümumqoşun Ordusunun postlarını erməni işğalçılarının başı üstündə “Damokl qılıncı”na bənzədirlər. Yəni, bu gün Naxçıvan ordusu Ali Baş Komandanın bütün əmrlərini hər an layiqincə yerinə yetirməyə hazırdır.

Digər tərəfdən isə strateji yüksəkliklərdə qurulan müdafiə sistemi nəticəsində düşmənə ciddi müqavimət göstərmək və onun itki verərək geri çəkilməsinə nail olmaq daha asandır. Məhz buna görə tarix boyu baş verən döyüşlərdə sərkərdələr öncə strateji yüksəkliklərin tutulmasını, mövqelərin möhkəmləndirilməsini əsas amil kimi ön plana çıxarıblar. Naxçıvanda Əmir Teymur kimi güclü sərkərdənin qüdrətli ordusuna qarşı 14 il mərdliklə müdafiə olunan Əlincə qalasının yüksəklikdə yerləşməsi də bu arqumentləri təsdiqləyir.

Bu gün Azərbaycanın əsas ərazisindən ayrı salınmış Naxçıvan Muxtar Respublikasındakı strateji yüksəkliklərdə etibarlı müdafiə sisteminin qurulması, burada ləyaqətlə Vətənin keşiyində dayanan əsgər və zabitlərin xidmət şəraitinin daim diqqətdə saxlanılması, maddi-texniki təminatın gündən-günə daha da yaxşılaşdırılması hər birimizdə qürur hissləri ilə bərabər əminlik yaradır. Naxçıvan Muxtar Respublikası Ali Məclisinin Sədri Vasif Talıbov dəfələrlə muxtar respublikanın strateji yüksəkliklərində xidmətin təşkili və şəxsi heyətin məişət şəraiti, buradakı vəziyyət ilə maraqlanıb.

Ötən ay Ali Məclisin Sədri növbəti dəfə muxtar respublikanın, hətta deyərdik ki, yerləşdiyimiz regionun ən əhəmiyyətli yüksəkliyində - Soyuq bölgəsindəki təmas xəttində xidmətin təşkili və şəxsi heyətin məişət şəraiti ilə maraqlanıb. Ali Məclisin Sədri deyib ki, hər bir ölkənin mövcudluğu onun sərhədlərindən başlanır. Döyüş bölgəsindəki şəxsi heyət qarşısında yalnız bir xidməti vəzifə durur: bu da Vətən torpaqlarının və sərhədlərimizin etibarlı qorunmasıdır. Lakin çətin dağlıq şəraitdə hərbi xidmətdə olan hər bir əsgər və zabit unutmamalıdır ki, o yalnız sərhədlərimizin deyil, həm də ölkəmizin təhlükəsizliyinin etibarlı təminatçısıdır. Soyuq bölgəsində xidmət edən əsgərlərimiz yüksək nizam-intizama və döyüş qabiliyyətinə malikdirlər. Şəxsi heyətin yüksək əhval-ruhiyyədə olması da yaradılan şəraitin və xidmətin düzgün təşkilinin nəticəsidir.

Vətən torpaqlarının qorunmasında əsgərlərə mərdlik və mübarizlik arzulayan Ali Məclisin Sədri muxtar respublikanın çətin dağlıq şəraitində yerləşən hərbi hissələrin bundan sonra da diqqət mərkəzində olacağını bildirib.

Xüsusi qeyd etmək istərdik ki, muxtar respublikanın Soyuq bölgəsində xidmət keçmək əzmkarlıq, cəsarət, Vətənə, xalqa, dövlətə, dövlətçiliyə bağlılıq tələb edir. Çünki bu bölgədə hava şəraiti, xüsusən payız, qış, yaz aylarında adı kimi şaxtalı və soyuq keçir. Burada, sözün həqiqi mənasında, qış çovğununun, tufanının şahidi olmaq mümkündür. Biz səsi ilə yeri-göyü lərzəyə salan, gecənin zülmət qaranlığında bir anda hər tərəfi aydınladan ildırımları, şimşəkləri səmada görürük. Başı buludlara dəyən, dəniz səviyyəsindən 3904 metr yüksəklikdəki zirvədə xidmət edən Vətən övladları bu yüksəklikdə çaxan ildırımlar kimi düşmənin gözünə ox kimi batır, ilin istənilən fəslində Vətənə ləyaqətlə xidmət edir, düşmənə gözdağı kimi hərbi postlarımızda boy göstərir, onu nəzarətdə saxlayırlar.

Bu gün cəmiyyətimiz əmindir ki, Azərbaycanda, o cümlədən onun ayrılmaz tərkib hissəsi olan Naxçıvan Muxtar Respublikasında dövlətimiz əsgər və zabitlərimizin bütün problemləri ilə maraqlanır, onlardan qayğısını əsirgəmir. Azərbaycan Respublikasının Prezidenti, Ali Baş Komandan İlham Əliyevin dəfələrlə təmas xəttində olması da bunun bariz nümunəsidir.

Yuxarıda qeyd etdiyimiz kimi, bu gün muxtar respublikanın strateji əhəmiyyətli zirvə və yüksəkliklərində etibarlı müdafiə sistemi formalaşdırılıb. Bu yüksəkliklərdə peşəkar və yüksək döyüş hazırlığına malik olan əsgər və zabitlərimiz xidmət edirlər. Şəxsi heyət əməliyyat-taktiki səviyyədə yüksək döyüş hazırlığına malikdir. Təmas boyunca etibarlı əməliyyat mövqeyinin təmin edilməsi, hərbi intizamın daim möhkəmləndirilməsi, şəxsi heyətin peşəkarlığının artırılması diqqət mərkəzində saxlanılır. Postlar arasında səmtləşmənin aparılması, bölmələr arasında rabitə əlaqəsinin qurulması və müşahidənin düzgün təşkili etibarlı müdafiə sistemi yaradıb. Dayaq məntəqələri və postlar müasir döyüş texnikaları, artilleriya qurğuları və atıcı silahlarla təmin olunub. Döyüş növbətçiliyini aparan şəxsi heyətin istifadəsində olan cihazlar isə ən çətin hava şəraitində belə, qarşı tərəfin mövqelərinin müşahidə edilməsinə imkan verir.

Bu gün Naxçıvan Muxtar Respublikasında hər sahədə olduğu kimi, müdafiə sisteminin təkmilləşdirilməsi, gücləndirilməsi sahəsində də Ulu Öndərimizin arzuları reallaşdırılıb, bu gözəl məkanda Azərbaycan Prezidenti İlham Əliyevin müvafiq tapşırıqları yerinə yetirilib. Hərbi hissələrdə xidmətin günün tələbləri səviyyəsində təşkili üçün hər cür şərait yaradılıb, maddi-texniki baza tələb olunan səviyyədə möhkəmləndirilib, həyata keçirilən kompleks tədbirlər hərbçilərin döyüş qabiliyyətinin və mənəvi-psixoloji vəziyyətinin yüksəlməsinə səbəb olub.

Bir daha əminliklə deyə bilərik ki, Naxçıvan Muxtar Respublikasının Əlahiddə Ümumqoşun Ordusunun strateji yüksəkliklərdə yerləşən hissə və bölmələri sərhədlərimizi etibarlı müdafiə edir və düşmənə layiqli cavab verməyə tam hazırdır. Dövlətimizin başçısı İlham Əliyev Naxçıvandakı ordu birliklərimizin yüksək döyüş qabiliyyətinə malik olduğunu bildirərək deyib: “Naxçıvanın hərbi potensialı çox yüksək səviyyədədir. Naxçıvanın müdafiəsi üçün hər şey edilib və Naxçıvan özünü istənilən hücumlardan tam şəkildə müdafiə etməyə və eyni zamanda, istənilən hərbi vəzifəni icra etməyə qadirdir”.

Rauf Əliyev

AZƏRTAC-ın Naxçıvan Muxtar Respublikasındakı

bürosunun rəhbəri