İDMAN
NAZİM ƏLİCANOV SƏRBƏST GÜLƏŞ ÜZRƏ AVROPA ÇEMPİONUDUR
Azərbaycan idmançısı, hərbçilərin olimpiadası və dünya birinciliyinin qalibi Nazim Əlicanov Bakıda keçirilən sərbəst güləş üzrə 45-ci Avropa çempionatında 55 kiloqram çəki dərəcəsində qızıl medal qazanmışdır.
Dörd görüşü uğurla başa vuran idmançımız mayın 3-də finalda Moldova güləşçisi Gennadi Tubea ilə birinci yer uğrunda mübarizə aparmışdır. Nazim Əlicanov son dərəcə gərgin keçən bu görüşdə gözəl texnika və qələbə əzmi nümayiş etdirərək, güclü rəqibinə 3:1 hesabı ilə qalib gəlmişdir.
Həmin gün daha bir idmançımız - 66 kiloqram çəki dərəçəsində çıxış edən Elman Əsgərov final görüşü keçirmişdir. Bu görüş Rusiya idmançısı Zaur Botayevin qələbəsi ilə başa çatmış, Azərbaycan pəhləvanı gümüş medal qazanmışdır.
Çəkisi 74 kiloqram olan idmançıların final görüşündə də Rusiya komandasının üzvü Zahid Zahidov qalib gəlmişdir.
Qaliblərə qızıl medalları Azərbaycan Milli Olimpiya Komitəsinin prezidenti İlham Əliyev, Beynəlxalq Güləş Federasiyasının birinci vitse-prezidenti Rafael Martinett və üçqat olimpiya çempionu Aleksandr Medved təqdim etmişlər.
Mayın 4-də digər çəki dərəcələrində qaliblər müəyyən olunacaqdır.
X X X
Azərbaycan Milli Olimpiya Komitəsinin Prezidenti, Milli Məclisin deputatı İlham Əliyev Azərbaycan televiziyasına qısa müsahibə vermişdir.
JURNALİST: Sərbəst güləş üzrə Avropa çempionatında ilk çəki dərəcələri üzrə final görüşləri keçirildi, Azərbaycan idmançıları bir qızıl və bir gümüş medal qazandılar. İlham müəllim, idmançılarımızın bu qələbəsi münasibətilə sizi təbrik edirik.
İLHAM ƏLİYEV: Mən də sizi və bütün idman həvəskarlarını təbrik edirəm. Doğrudan da, bu, çox böyük qələbədir. Bu mötəbər Avropa çempionatında Azərbaycanın bir qızıl, bir gümüş medalı vardır. Güləşçilərimiz çox gözəl yarışdılar. Gördüyünüz kimi, bu böyük idman salonu tamaşaçılarla doludur.
Mən idmançılarımızı bir daha təbrik edirəm. Minnətdarlığımı bildirirəm ki, onlar gözəl çıxışları və əldə etdikləri qələbə ilə Azərbaycan xalqını sevindirdilər. Ona görə də mən xalqımızı, idmançılarımızı bu gözəl qələbə münasibətilə təbrik edirəm.
JURNALİST: Mayın 4-də Avropa çempionatı davam edəcək, yəqin ki, Azərbaycan idmançıları yenə də böyük nailiyyətlər əldə edəcəklər.
İLHAM ƏLİYEV: Hər halda, biz istərdik ki, bu qələbələr davam etsin. Əminəm ki, idmançılarımız öz məsuliyyətlərini yaxşı dərk edirlər. İnanıram ki, onlar bizə daha çox medallar bəxş edəcəklər.
Foto İlqar Cəfərovundur