Nazir müavini: Gübrə satışında heç bir qiymət artımı yoxdur
Şəki, 3 mart, Mustafa Dadaşov, AZƏRTAC
Hazırda ölkəmizdə mineral gübrələrin 70 faizi dövlət tərəfindən subsidiyalaşdırılır. Əvvəllər isə bu rəqəm 50 faiz təşkil edirdi.
AZƏRTAC xəbər verir ki, bunu kənd təsərrüfatı nazirinin müavini İlham Quliyev Şəkidə jurnalistlərə açıqlamasında deyib.
Son zamanlar manatın məzənnəsinin dəyişməsi ilə əlaqədar gübrə satışında süni qiymət artımına yol verməmək üçün qabaqlayıcı tədbirlərin həyata keçirildiyini deyən İ.Quliyev qeyd edib ki, bu günlərdə Kənd Təsərrüfatı Nazirliyinin rəhbərliyi gübrə satışı ilə məşğul olan təşkilatların nümayəndələri, fermer və sahibkarlarla görüşüb, qarşılıqlı fikir mübadiləsi aparılıb. Hazırda gübrələrin satışı əvvəlki qaydada davam edir, heç bir qiymət artımı yoxdur.
Nazir müavini “Yaz tarla işlərinə hazırlıq və məhsuldarlığın yüksəldilməsi üçün qarşıda duran vəzifələr” mövzusunda Şəkidə keçirilən regional müşavirədən də danışaraq bildirib ki, belə müşavirələr məhsul istehsalçılarına məsləhət-informasiya xidmətinin göstərilməsi məqsədi daşıyır. “Fermerlərlə açıq fikir mübadiləsinin aparılması, şübhəsiz ki, kənd təsərrüfatı işlərinin yüksək səviyyədə həyata keçirilməsinə və məhsul istehsalının artmasına öz töhfəsini verəcək”, - deyə İ.Quliyev əlavə edib.
Bölmənin digər xəbərləri
