NAZİRLƏR KABİNETİNDƏ QƏBUL
Martın 7-də baş nazir Artur Rasizadə ATƏT-in hazırki sədri, Portuqaliyanın xarici işlər naziri Jaymi Qamanı qəbul etmişdir.
Artur Rasizadə iqtisadiyyatda aparılan islahatlar barədə qonağa məlumat verərək bildirdi ki, son illər bu sahədə böyük nailiyyətlər qazanılmışdır. Baş nazir vurğuladı ki, bu il ATƏT-in Minsk qrupunun yaradılmasının 10 ili tamam olur. Bununla belə, indiyədək Ermənistan-Azərbaycan, Dağlıq Qarabağ münaqişəsi həll edilməmişdir.
Cənab Jaymi Qama bildirdi ki, ölkədə yaranmış yaxşı makroiqtisadi vəziyyətdən xəbərdardır. O, bu il ATƏT çərçivəsində Bakıda keçiriləcək iqtisadi foruma hazırlığa görə Azərbaycan hökumətinə təşəkkür etdi.
Görüş zamanı Artur Rasizadə vurğuladı ki, Azərbaycanın əsas problemi Ermənistan-Azərbaycan münaqişəsinin həlli və doğma yurdundan didərgin salınmış bir milyon insanın öz yerlərinə qaytarılmasıdır.
Qəbulda ATƏT-ın Bakı ofisinin başçısı Piter Burxard, ATƏT-in hazırki sədrinin xüsusi nümayəndəsi Ancey Kasprşik, Rumıniyanın Bakıdakı səfiri Tasım Cəmil iştirak edirdilər.
Bölmənin digər xəbərləri
