“NƏ? HARADA? NƏ VAXT?” İNTELLEKTUAL OYUNU ÜZRƏ BAKI BİRİNCİLİYİ KEÇİRİLMİŞDİR
Bakı, 30 yanvar (AZƏRTAC). Gəncliyə Yardım Fondunda “Nə? Harada? Nə vaxt?” intellektual oyunu üzrə Bakının məktəbliləri arasında paytaxt birinciliyi keçirilmişdir. 2 fevral - Azərbaycan Gəncləri Gününə həsr olunmuş tədbir Gəncliyə Yardım Fondu və Bakı şəhər Gənclər və İdman Baş İdarəsinin (BŞGİBİ) təşkilatçılığı ilə keçirilmişdir. Yarışda Bakının müxtəlif rayonlarından 26 komanda iştirak etmişdir.
Açılış mərasimində çıxış edən Gəncliyə Yardım Fondunun prezidenti Əhməd Tecem ümummilli lider Heydər Əliyevin Azərbaycan gəncliyinə böyük qayğı ilə yanaşdığını xatırlatmışdır. Hər il fevralın 2-nin Gənclər Günü kimi qeyd olunması bu dahi şəxsiyyət tərəfindən Azərbaycan gənclərinə verilən böyük töhfədir.
BŞGİBİ-nin gənclərlə iş sektorunun müdiri Nəcəf Novruzov iştirakçılara uğurlar arzulayaraq, belə tədbirlərin gənclərin sağlam, intellektual böyüməsində mühüm rol oynadığını söyləmişdir.
Yarışın nəticələrinə əsasən “Nizami-1” komandası çempion olmuşdur. “Suraxanı-1” ikinci, “Əzizbəyov-1” komandası isə üçüncü olmuşdur.
Fərqlənmiş komandalar qiymətli hədiyyələr və diplomlarla təltif olunmuşlar.
Bölmənin digər xəbərləri
