“NEFT AKADEMİYASI – ITOCHU OIL EXPLORATION” - ƏMƏKDAŞLIQ BAŞLANDI
Azərbaycan Dövlət Neft Akademiyasının rektoru, MEA-nın müxbir üzvü Siyavuş Qarayev martın 6-da Yaponiyanın “ITOCHU OIL EXPLORATION Co.Ltd” şirkətinin sədri cənab Şiro Morita ilə görüşmüşdür.
Bu şirkət “Əsrin müqaviləsi”ni həyata keçirmək üçün yaradılmış konsorsiumun iştirakçısıdır və bir neçə ildir ki, müxtəlif sahələrdə xeyriyyəçilik fəaliyyəti göstərir. Təhsil sahəsində xeyriyyəçilik layihələrini həyata keçirmək üçün xüsusi fond - “ITOCHUOIL FUND” yaratmışdır.
Siyavuş Qarayev ölkəmizdə vəziyyət, respublikanın tərəqqisində Azərbaycan Prezidentinin əvəzsiz xidmətləri, Neft Akademiyasının yaranma tarixi, keçmiş İttifaqda və regionda elmi-texniki fikrin inkişafındakı rolu barədə ətraflı məlumat vermişdir.
Cənab Şiro Morita neft sənayesinin inkişafında akademiyanın rolunu yüksək qiymətləndirmiş və rəhbərlik etdiyi şirkətin Azərbaycanin bu nüfuzlu ali məktəbi ilə əməkdaşlıq yaratmaq niyyətində olduğunu bildirmişdir. Bu istiqamətdə ilk addım kimi o, Neft Akademiyasına müasir kompüter avadanlığı vermişdir.
Rektor hədiyyəyə görə qonağa təşəkkürünü bildirmiş və şirkətin planlarının həyata keçirilməsinə rəhbərlik etdiyi ali məktəbin köməyini təklif etmişdir.
Şirkətin Bakıdakı baş meneceri cənab Morişitanın da iştirak etdiyi görüşdə “ITOCHUOIL FUND” tərəfindən ayrılmış vəsait hesabına Neft Akademiyasında proqramlaşdırma və hesablayan elektron maşınların öyrənilməsi ilə bağlı fənlərin tədrisi üçün xüsusi kompüter sinfi yaratmaq barədə razılıq əldə edilmişdir.
Bölmənin digər xəbərləri
