Neftlə çirklənmiş torpaqların təmizlənməsi diqqət mərkəzindədir
Bakı, 31 avqust (AZƏRTAC). “Ekol Mühəndislik Xidmətləri” QSC-də ABŞ-ın Ohayo ştatında fəaliyyət göstərən FMT şirkətinin rəhbəri George Hay ilə görüş keçirilmişdir.
QSC-dən AZƏRTAC-a bildirmişlər ki, görüşdə mədən ərazilərində neftlə çirklənmiş torpaqların təmizlənməsi istiqamətində ARDNŞ-in “Ekol Mühəndislik Xidmətləri” QSC qarşısında qoyduğu vəzifələrin icrası ilə əlaqədar məsələlər müzakirə olunmuşdur.
FMT şirkətinin uzun illərdir neftlə çirklənmiş torpaqların və daş-kömür yataqlarından atılan tullantıların təmizlənməsi ilə məşğul olduğunu deyən G.Hay qeyd etmişdir ki, bu tullantıların təmizlənməsində ABŞ-ın “Tarmac İnternational İNC.” şirkətinin istehsalı olan qurğudan istifadə olunur. FMT şirkəti Rumıniyada 15 hektar sahədə 220 min tona qədər neftlə çirklənmiş torpaqların termik üsulla təmizlənməsini həmin qurğu vasitəsilə uğurla həyata keçirmişdir.
Sonra “Tarmac İnternational İNC.” şirkətinin istehsalı olan qurğunun təqdimatı keçirilmişdir.
Görüşdə əməkdaşlığın daha da dərinləşdirilməsi istiqamətində müzakirələr aparılmışdır.
Bölmənin digər xəbərləri
