NƏSİMİ RAYONUNDA 20 YANVAR FACİƏSİNİN İLDÖNÜMÜ İLƏ BAĞLI TƏDBİRLƏR PLANI HAZIRLANMIŞDIR
Bakı, 7 yanvar (AZƏRTAC). Nəsimi Rayon İcra Hakimiyyətində (RİH) 20 Yanvar faciəsinin iyirminci ildönümü ilə bağlı tədbirlər planı hazırlanmışdır.
Faciənin ildönümü ərəfəsində idarə və təşkilatlarda 20 Yanvar gününün Azərbaycanın azadlığı, müstəqilliyi və ərazi bütövlüyü uğrunda qəhrəmanlıq rəmzi kimi qeyd edilməsi ilə əlaqədar toplantılar keçiriləcəkdir. İldönümlə bağlı H.Sarabski adına mədəniyyət evində müxtəlif tədbirlərin - bədii gecələrin, fotostendlərin və rəsm əsərlərinin nümayişinin təşkili, rayonun ərazisindəki məscidlərdə şəhidlərin xatirəsinə duaların oxunması və s. nəzərdə tutulmuşdur. Tədris müəssisələrində ədəbi-bədii gecələr, rəsm müsabiqələri, şəhid ailələrinin üzvləri ilə görüşlər, Qanlı Yanvar faciəsinə həsr edilmiş xüsusi dərslər təşkil olunacaqdır. 20 Yanvar şəhidlərinin ailə üzvləri ilə keçiriləcək görüşdə onlara humanitar yardım ediləcəkdir.
Yanvarın 20-də Şəhidlər xiyabanı ictimaiyyət tərəfindən ziyarət olunacaq, saat 12.00-da rayonun ərazisində şəhidlərin əziz xatirəsi bir dəqiqəlik sükutla yad ediləcəkdir.
Bölmənin digər xəbərləri
