Nəsimi rayonunun məzunlarına Ulu Öndərin təhsil siyasəti barədə məlumat verilib
Bakı, 29 avqust, AZƏRTAC
Heydər Əliyev İli çərçivəsində Nəsimi Rayon İcra Hakimiyyətində keçirilən rayon icra hakimiyyəti başçısı yanında şuranın geniş tərkibli iclasında rayonda 2022/2023-cü tədris ilinin yekunları və yeni təhsil ilinə hazırlığın vəziyyəti müzakirə olunub.
Rayon icra hakimiyyətindən AZƏRTAC-a bildirilib ki, əvvəlcə Vətən uğrunda canlarından keçmiş qəhrəman şəhidlərimizin ruhu bir dəqiqəlik sükutla yad edilib, sonra “Heydər Əliyev və təhsil” mövzusunda hazırlanmış videoçarx nümayiş olunub.
Tədbirdə YAP Nəsimi rayon təşkilatının əməkdaşları, Ağsaqqallar Şurasının, İctimai Şuranın, rayon bələdiyyəsinin üzvləri, təhsil müəssisələrinin nümayəndələri, 2022/2023-cü tədris ilində yüksək bal toplamış məzunlar, valideynlər və rayon ictimaiyyəti iştirak edib.
Ümummilli Lider Heydər Əliyevin Azərbaycanda elm və təhsillə bağlı siyasətindən danışan rayon icra hakimiyyətinin başçısı Asif Əsgərov qeyd edib ki, bu uğurlu siyasət real şəkildə özünün müsbət təzahürünü göstərib. Azərbaycan müstəqillik qazandıqdan sonra ölkədə təhsilin milli əsaslar üzərində yenidən qurulması, əsl inkişafa qоvuşması məhz Heydər Əliyev dühası sayəsində gerçəkləşib.
Vurğulanıb ki, Ümummilli Liderin siyasətini uğurla davam etdirən Prezident İlham Əliyev tərəfindən ölkəmizdə təhsilə olan diqqət və qayğı göz qabağındadır. Son illərdə ölkədə yeni məktəb binalarının tikintisi və köhnələrin əsaslı təmiri böyük vüsət alıb. Eyni zamanda, ölkəmizdə təhsil infrastrukturunun yenilənməsinə Cənubi Qafqazın ən böyük ictimai təşkilatı olan Heydər Əliyev Fondu da öz töhfəsini verir. Birinci xanım Mehriban Əliyevanın rəhbərlik etdiyi Fond tərəfindən reallaşdırılan “Yeniləşən Azərbaycana yeni məktəb” layihəsi çərçivəsində ölkənin müxtəlif bölgələrində 100 mindən artıq şagirdin təhsil aldığı 400-dək məktəb binası inşa olunub və yaxud əsaslı şəkildə yenidən qurulub. O cümlədən, Nəsimi rayonunda təhsilin səviyyəsi, orta məktəblərdə şagirdlərin normal təhsili üçün hər cür şəraitin yaradılması, məktəblərin maddi-texniki bazalarının vəziyyəti daim diqqət mərkəzində saxlanılır. Rayonda 8 ali, 2 orta ixtisas, 24 tam orta məktəb, 4 özəl təhsil müəssisəsi, 4 türk liseyi, 1 xüsusi məktəb, 2 musiqi məktəbi və 33 məktəbəqədər təhsil müəssisəsi fəaliyyət göstərir. 2022/2023-cü tədris ilində rayonun orta məktəblərini 2308 nəfər şagird bitirib. Cari ildə 3399 nəfər şagird birinci sinfə qəbul olunub. Rayonda 2683 nəfər təhsil işçisi fəaliyyət göstərir. Qəbul imtahanlarında abituriyentlərdən 68 nəfəri 600-dən, 25 nəfəri isə 650-dən çox bal toplayıb. 2022/2023-cü təhsil ilinin yekunlarına görə Nəsimi rayonu üzrə 15 məzun qızıl, 11 məzun gümüş nişana layiq görülüb.
Qeyd edilib ki, Respublika fənn olimpiadasında Nəsimi rayonu üzrə 2022-2023-cü tədris ilinin yekunlarına görə 7 şagird uğur qazanıb.
Tədbirdə iştirak edən məktəb rəhbərləri, məzunları, şagirdləri, valideynlər göstərilən diqqət və qayğıya görə Prezident İlham Əliyevə və birinci xanım Mehriban Əliyevaya öz minnətdarlıqlarını bildiriblər.
Sonra qəbul imtahanlarında yüksək nəticələr göstərmiş, qızıl və gümüş nişana layiq görülmüş məzunlara qiymətli hədiyyələr, həmçinin təhsildə fərqlənən və rayon ərazisində yaşayan sosial qayğıya ehtiyacı olan ailələrdən 500 nəfərdən artıq şagirdə məktəbli forması təqdim edilib.
Sonda 2 nömrəli və 5 nömrəli Uşaq-Gənclər İnkişaf Mərkəzinin dərnək üzvlərinin müxtəlif musiqi nömrələri səsləndirilib.
Bölmənin digər xəbərləri
