Nigeriyada quldur dəstələri bir sutkada 45 nəfəri qətlə yetirib
Bakı, 22 aprel, AZƏRTAC
Ötən sutka ərzində Nigeriyanın şimal-qərbində quldurlar tərəfindən azı 45 nəfər qətlə yetirilib.
AZƏRTAC Dailytrust portalına istinadla xəbər verir ki, silahlı quldurlar aprelin 21-də Maqami rayonunda yerləşən yeddi kəndə hücum edərək aralarında uşaqların da olduğu 45 nəfəri öldürüblər. Ştat rəhbərliyi həmin rayona polis bölmələri göndərib. Yerli hakimiyyət orqanlarının məlumatına görə, həmin ərazidə 30 mindən çox quldur fəaliyyət göstərir, onlarla qarşı isə təhlükəsizlik qüvvələrinin 5 min əməkdaşı mübarizə aparır.
Qeyd edək ki, son aylar Nigeriyanın bir sıra mərkəzi və şimal rayonlarında quldurların hücumlarında artım müşahidə edilir. Cinayətkarlar insanları qətlə yetirir, pul müqabilində azad etmək üçün girov götürür, mal-qaranı oğurlayır, yerli sakinləri qorxu içində saxlayır və onlardan xərac tələb edir. Hakimiyyət orqanları yaranmış vəziyyətdə xüsusi polis dəstələri və ordu hissələrinin köməyi ilə quldurlara qarşı mübarizə aparmağa çalışır.
Bölmənin digər xəbərləri
