NOBEL MÜKAFATLARI LAUREATLARININ ELAN OLUNACAĞI TARİX MÜƏYYƏN EDİLDİ

26.08.2004 [14:35]
Çap et
A⁺ A^-

AZƏRTAC xəbər verir ki, xarici informasiya agentliklərinin yaydığı məlumata görə, Nobel Fondu Nobel mükafatları laureatlarının və onların pul məbləğlərinin elan ediləcəyi tarixi açıqlamışdır. Onların banisi Alfred Nobelin vəsiyyətində göstərilən beş sahə (fiziologiya və ya təbabət, fizika, kimya, ədəbiyyat) üzrə mükafatlardan hər biri və sülh mükafatı bu il 10 milyon İsveç kronu (1 milyon 342 min dollar) məbləğində olacaqdır.

Fiziologiya və ya təbabət üzrə laureatlar oktyabrın 4-də Karolina İnstitutunda, fizika və kimya üzrə mükafatların sahibləri oktyabrın 5-də və 6-da İsveç Kral Elmlər Akademiyasında elan ediləcəkdir. Sülh mükafatına kimin layiq görüldüyü oktyabrın 8-də Osloda bildiriləcəkdir. İqtisadiyyat sahəsində mükafatın (İsveç Bankı tərəfindən ödənilir) laureatının adı oktyabrın 11-də İsveç Kral Elmlər Akademiyasında açıqlanacaqdır. Ədəbiyyat üzrə mükafatın laureatı sonra, bu Akademiyanın 18 ömürlük üzvünün iclaslarından birində elan ediləcəkdir.

Xatırladaq ki, Nobel mükafatı təsis edildiyi vaxtdan bəri 103-cü dəfə təqdim olunacaqdır.