NORVEÇLİLƏR NEFT HASİLATI TEXNOLOGİYASINI TƏKMİLLƏŞDİRİRLƏR
Norveçin “Norsk hidro” dövlət neft-qaz konserni neft və qaz hasilatının və ətraf mühitə zərərli təsiri azaltmağın daha səmərəli üsullarını hazırlamaq məqsədi ilə tədqiqat aparır.
Hazırda Norveçdə neft və suyu Şimal, Norveç və Barens dənizlərindəki kontinental şelfdə yerləşən neft-qaz platformalarının özündə bir-birindən ayırırlar. Bu üsul baha başa gəlir, həm də ətraf mühitə zərər vurur.
İTAR-TASS-ın verdiyi xəbərə görə, “Norsk hidro” tədqiqat layihələrinin həyata keçirilməsinə ildə 400 milyon kron (50 milyon dollardan çox) sərmayə qoyur.
“Aftenposten” qəzeti yazır ki, hazırda platforma bilavasitə dənizdə tikilir və su altında hasilat işləri buradan idarə edilir. Nəzərdə tutulduğuna görə, gələcəkdə neft və qaz hasilatı sahildən idarə olunacaq, çıxarılan neft və qaz da sahilə göndəriləcəkdir.
Porsqrünndəki laboratoriyalarda neftin sudan ayrılması metodu da araşdırılır, lakin bu proses platformada deyil, birbaşa neft hasil edildiyi dərinliklərdə gedəcəkdir. Bu təcrübə dənizdəki “Troll” yatağında da qismən tətbiq edilmişdir. İşlər intensiv gedir, amma “Norsk hidro” konserni mütəxəssislərinin dediklərinə görə, bunların real tətbiqi üçün hələ xeyli vaxt gərəkdir.
Bölmənin digər xəbərləri
