İQTİSADİYYAT
NÖVBƏTİ “BAKI-CEYHAN: NEFT ODİSSEYASI-2002” MOTOSİKLET YÜRÜŞÜ START GÖTÜRDÜ
Avqustun 26-da növbəti “Bakı-Ceyhan: neft odisseyası-2002” motosiklet yürüşü start götürmüşdür. Builki yürüşdə 12 motosikletçi iştirak edir. Onlar rəmzi olaraq, Bakı-Tbilisi-Ceyhan əsas ixrac neft kəməri marşrutu ilə bir barrel neft aparacaqlar.
Ənənəyə görə, yürüşdə Azərbaycanın incəsənət xadimləri də iştirak edirlər. Rəşid Behbudov adına Mahnı Teatrının 30-a yaxın artisti yürüş zamanı rayonlarımızın sakinləri, qaçqınlar və məcburi köçkünlər üçün konsertlər verəcəkdir. Gürcüstan və Türkiyə ərazisində bu dövlətlərin 40-a yaxın motosikletçisi də yürüş iştirakçılarına qoşulacaqdır.
Yürüşün təşəbbüskarı, tanınmış ABŞ jurnalisti Tomas Qoltsun fikrincə, motosiklet yürüşünü keçirməkdən məqsəd dünya ictimaiyyətinin diqqətini Bakı-Tbilisi-Ceyhan boru kəmərinin tikintisi ilə əlaqədar sosial-ekoloji problemlərə yönəltməkdir. Layihənin sponsorları Azərbaycan Dövlət Neft Şirkəti, Gürcüstan Beynəlxalq Neft Korporasiyası və Türkiyənin “Botaş” şirkətidir.
Sentyabrın 5-də Türkiyənin Ceyhan limanında başa çatması nəzərdə tutulan yürüşün başlanması mərasimində ARDNŞ-in, Gənclər, İdman və Turizm Nazirliyinin rəhbərləri iştirak etmişlər.