Bakı, 24 fevral, AZƏRTAC

ABŞ-ın Nyu-Meksiko ştatının Senatı fevralın 23-də keçirilən plenar iclasında Azərbaycandakı tolerantlıq mühitini təqdir edən qətnamə qəbul edib.

Xarici İşlər Nazirliyinin mətbuat xidmətindən AZƏRTAC-a bildiriblər ki, qətnamə qəbul edildikdən sonra onun nüsxəsi plenar iclasda iştirak edən Azərbaycanın Los-Ancelesdəki baş konsulu Nəsimi Ağayevə təqdim olunub. Baş konsul çıxış edərək, Azərbaycanın tolerantlıq modelinin bütün dünya üçün nümunəvi olduğunu söyləyib və Senatın üzvlərinə belə bir önəmli sənədin qəbuluna görə təşəkkürünü bildirib.

Ştatın senatorları tərəfindən yekdilliklə qəbul edilən qətnamədə Azərbaycanın tarixi tolerantlıq ənənələrinə toxunularaq, burada qədim zamanlardan müxtəlif dini etiqadların, o cümlədən müsəlmanların, yəhudilərin və xristianların sülh və əmin-amanlıq şəraitində birgə yaşadığı diqqətə çatdırılır. Həmçinin bildirilir ki, hazırda dünyanın müxtəlif bölgələrində dini radikalizm, terrorizm, dözümsüzlük və ksenofobiya kimi halların artdığı bir dövrdə Azərbaycan özünəməxsus tolerantlıq təcrübəsi ilə beynəlxalq ictimaiyyət üçün uğurlu bir model təşkil edir. Qətnamədə o da vurğulanır ki, Azərbaycan rəhbərliyi belə mütərəqqi mühitin inkişaf etdirilməsində böyük rol oynamaqda və bu prosesləri müxtəlif vasitələrlə dəstəkləməkdədir.

Sənəddə, eyni zamanda, 2015-ci ilin may ayında Azərbaycanda keçirilməsi nəzərdə tutulan Üçüncü Ümumdünya Mədəniyyətlərarası Dialoq Forumunun önəminə yer verilərək bildirilir ki, ABŞ tolerant və dünyəvi dostlarını dəstəkləməli və Azərbaycanın tolerantlıq modelinin bütün dünyada tətbiqinə çalışmalıdır.

Qətnamədə bu sənədin surətlərinin ABŞ Prezidentinə, dövlət katibinə, Konqresə, Nyu-Meksikonu Konqresdə təmsil edən senator və konqresmenlərə göndəriləcəyi bildirilir.

Qeyd edək ki, bu, ABŞ-da ştatlar səviyyəsində Azərbaycanın tolerantlıq ənənələrinə dair qəbul olunan ilk qətnamədir.